Хулосаи мушоҳидони ИДМ оид ба интихоботи парлумонии Тоҷикистон
Ҳайати нозирони ИДМ дар ҷараёни интихоботи Маҷлиси намояндагон, ки 2-юми март баргузор шуд, ягон қонуншиканӣ ошкор накарданд.
3-юми март роҳбари намояндагӣ Леонид Анфимов зимни нишасти матбуотӣ бахшида ба натиҷаҳои мониторинги омодагӣ ва баргузории маъракаи интихоботӣ дар ин бора чунин изҳори назар намуд: «Ҳайати нозирони ИДМ ба хулоса омад, ки интихоботи Маҷлиси намояндагон, ки 2-юми марти соли 2025 баргузор гардид, комилан мутобиқи Конститутсия ва қонунгузории интихоботии Ҷумҳурии Тоҷикистон баргузор гардид».
ШАФФОФ, БОЭЪТИМОД ВА ДЕМОКРАТӢ
Баҳои ҳайати мушоҳидони СҲШ ба рафти интихобот
3-юми март дар шаҳри Душанбе баъди эълони натиҷаҳои пешакии интихоботи вакилони Маҷлиси намояндагон бо иштироки мушоҳидони байналмилалии СҲШ нишасти матбуотӣ баргузор гардид.
Муовини Дабири кулли СҲШ Пиао Янфан иброз намуд, ки Созмон бо даъвати Вазорати корҳои хориҷӣ 2-юми март дар мониторинги байналмилалии омодагӣ ва баргузории интихоботи вакилони Маҷлиси намояндагон иштирок намуд.
Ҳайат фаъолияти баланди шаҳрвандии интихобкунандагон ва маҳорати касбии кормандони комиссияҳои участкавии интихоботро дар ташкил ва гузаронидани овоздиҳӣ таъкид намуда, интихоботи баргузоршударо шаффоф, боэътимод ва демократӣ эътироф кард.
Мулоқоти котиби Шурои амният бо директори Кумитаи иҷроияи Сохтори минтақавии зиддитеррористии СҲШ
3-юми март котиби Шурои амнияти Ҷумҳурии Тоҷикистон Раҳмон Юсуф бо директори Кумитаи иҷроияи Сохтори минтақавии зиддитеррористии СҲШ Уларбек Шаршеев вохӯрд.
Тавре АМИТ «Ховар» иттилоъ медиҳад, дар вохӯрӣ масоили густариши ҳамкории дуҷониба ва бисёрҷониба дар мубориза бар зидди терроризму экстремизми байналмилалӣ ва дигар зуҳуроти номатлуби ҷаҳони муосир, аз қабили гардиши ғайриқонунии маводи нашъаовару аслиҳа ва ҷиноятҳои муташаккили фаромилӣ дар қаламрави давлатҳои аъзои Созмон ва минтақа, мавриди баррасӣ қарор гирифтанд.
Ҳамкории Тоҷикистон ва БОР оид ба рушди инноватсия ва технологияҳои рақамӣ
Таҳкими ҳамкорӣ дар соҳаи инноватсия байни Тоҷикистон ва Бонки осиёии рушд (БОР) дар мулоқоти директори Агентии инноватсия ва технологияҳои рақамӣ Хуршед Мирзо бо намояндаи доимии Бонк дар Тоҷикистон Ко Сакамото баррасӣ гардид.
Аз Агентӣ ба мо иттилоъ доданд, ки Бонк таҳияи Стратегияи ҳамкорӣ бо Тоҷикистон барои солҳои 2026-2030-ро идома хоҳад дод. Дар ин замина, пешниҳод шуд, ки рушди соҳаи инноватсия ва технологияҳои рақамӣ дар Тоҷикистон ҳамчун ҷузъи муҳими ин Стратегия пешбинӣ шавад.
Ҳайати Тоҷикистон дар ҷаласаи Комиссияи байниҳукуматии ТРАСЕКА
Дар Теҳрон ҷаласаи Комиссияи байниҳукуматии Барномаи ҳамкории байналмилалӣ байни Иттиҳоди Аврупо ва кишварҳои шарик оид ба ташкили долони нақлиётии «Аврупо – Қафқоз – Осиё» (Transport Corridor Europe-Caucasus-Asia, TRACECA) баргузор гашт.
Хадамоти матбуоти Вазорати нақлиёт иттилоъ медиҳад, ки дар ҷаласа, ҳамчунин, масъалаҳои афзалиятноки марбут ба рушди ҳамлу нақл, сода кардани расмиёти убури марзҳо, рақамикунонӣ ва дигар тадбирҳое, ки ба ривоҷи минбаъдаи долони ТРАСЕКА дахл доранд, баррасӣ шуданд.
Дар Тоҷикистон Стратегияи миллии бехатарии ҳаракат дар роҳ таҳия мегардад
«Тоҷикистон талош дорад, ки дар натиҷаи ба истифода додани роҳҳои босифат ва замонавӣ, шумораи фавт ва ҷароҳатҳои вазнинро ҳангоми садамаҳои нақлиётӣ аз байн барад».
Чунин гуфта шуд дар ҳамоише, ки дар Душанбе, дар доираи лоиҳаи «Беҳтар намудани роҳҳои алоқаи минтақавӣ дар Осиёи Марказӣ» (БРАМОМ-4)-и назди Вазорати нақлиёти ҷумҳурӣ баргузор гардид.
Ҳамоиш яке аз тадбирҳои муҳим дар самти таҳияи Стратегияи миллии бехатарии ҳаракат дар роҳ ва Нақшаи амали Ҷумҳурии Тоҷикистон барои солҳои 2025-2035 мебошад.
Шиносоии намояндагони АБНА бо фаъолияти муассисаҳои соҳаи тандурустӣ
Ҳайати намояндагони Агентии байналмилалии неруи атомӣ (АБНА) дар доираи барномаи аудити байналмилалӣ дар Тоҷикистон қарор доштанд.
Ҳадафи сафари онҳо санҷиши фаъолияти муассисаҳои соҳаи тандурустии бо таҷҳизоти радиатсионӣ ва технологияҳои ядроӣ коркунанда ва арзёбии риояи меъёрҳои амнияти радиатсионӣ дар ин муассисаҳо ба шумор мерафт.
