ТАШРИФИ ПРЕЗИДЕНТҲОИ ҚИРҒИЗИСТОН ВА ӮЗБЕКИСТОН БА ТОҶИКИСТОН
31-уми март Президенти Ҷумҳурии Қирғизистон муҳтарам Садир Жапаров барои мулоқоту музокироти сеҷонибаи сарварони давлатҳои Тоҷикистон, Қирғизистон, Ӯзбекистон ва иштирок дар тантанаҳои идонаи Наврӯзи байналмилалӣ ва дигар чорабиниҳои муштарак ба шаҳри Хуҷанди вилояти Суғд ташриф овард.
Дар Фурудгоҳи байналмилалии шаҳри Хуҷанд меҳмони воломақомро ба нишони накуҳамсоягӣ ва анъанаҳои меҳмоннавозӣ Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон истиқбол гирифтанд. Ба Президенти Ҷумҳурии Қирғизистон гулдухтарони тоҷик дастагул пешкаш намуданд.
Барои истиқболи меҳмони олиқадр дар майдони Фурудгоҳ роҳрави сурх густурда шуда, аксҳои сарварони давлатҳо, инчунин, парчамҳои давлатӣ ва шиорҳои тараннумгари дӯстию бародарии халқҳои се кишвари ҳамсоя насб гардида буданд.
Барномаи кӯтоҳи фарҳангӣ бо иштироки ҳунармандон дар Фурудгоҳ ба маросими истиқболи меҳмони воломақом шукӯҳи хос зам намуд.
31-уми март Президенти Ҷумҳурии Ӯзбекистон Шавкат Мирзиёев барои анҷом додани мулоқоту музокироти сеҷонибаи сарварони давлатҳои Тоҷикистон, Қирғизистон, Ӯзбекистон ва иштирок дар Ҷашни Наврӯзи байналмилалӣ ва дигар чорабиниҳои муштарак ба шаҳри Хуҷанди вилояти Суғд ташриф овард.
Дар Фурудгоҳи байналмилалии шаҳри Хуҷанд меҳмони воломақомро ба нишони накуҳамсоягӣ ва анъанаҳои меҳмоннавозӣ Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон истиқбол гирифтанд. Ба Президенти Ҷумҳурии Ӯзбекистон гулдухтарони тоҷик чун анъана дастагул пешкаш намуданд.
Барои истиқболи меҳмони олиқадр дар майдони Фурудгоҳ роҳрави сурх густурда шуда, аксҳои сарварони давлатҳо, инчунин, парчамҳои давлатӣ ва шиорҳои тараннумгари дӯстию бародарии халқҳои се кишвари ҳамсоя насб гардида буданд.
Барномаи кӯтоҳи фарҳангӣ бо иштироки ҳунармандон дар Фурудгоҳ ба маросими истиқболи меҳмони воломақом шукӯҳи хос зам намуд.
МУЛОҚОТИ ЭМОМАЛӢ РАҲМОН БО САДИР ЖАПАРОВ
31-уми март мулоқоти Президенти Ҷумҳурии Тоҷикистон муҳтарам Эмомалӣ Раҳмон ва Президенти Ҷумҳурии Қирғизистон Садир Жапаров, ки бо сафари корӣ ба шаҳри Хуҷанд ташриф овард, баргузор гардид.
Сарвари давлати мо меҳмони воломақомро хайрамақдам гуфта, ӯро бо Ҷашни байналмилалии Наврӯз табрик намуданд ва таъкид доштанд, ки вохӯриҳои имрӯза бо назардошти масъалаҳои баррасишаванда аҳамияти хосса доранд.
Ҳар ду роҳбар ҳамфикр буданд, ки имзои Протокол дар бораи табодули тасдиқномаҳои Шартнома дар бораи сарҳади давлатӣ ва ифтитоҳи хатти интиқоли барқи 500-киловолтаи «Датка – Хуҷанд»-и лоиҳаи САSА-1000 байни Тоҷикистон ва Қирғизистон рӯйдодҳои таърихӣ мебошанд.
Зимни музокирот сарварони ду давлат вазъ ва дурнамои муносибатҳои дуҷонибаи Тоҷикистону Қирғизистонро ҳамаҷониба баррасӣ карда, оид ба доираи васеи масъалаҳои марбут ба рушд ва таҳкими муносибатҳои накуҳамсоягии ду кишвар табодули афкор намуданд.
Роҳбарони давлатҳо таҳкими муколамаи сиёсии дуҷониба дар ҳама сатҳҳо ва такон бахшидан ба рушди ҳамкории тиҷоратию иқтисодиро бо таваҷҷуҳ ба афзун кардани ҳаҷми гардиши мол мутобиқ ба иқтидори мавҷудаи ду кишвар ба мақсад мувофиқ донистанд. Дар робита ба ин, аҳамияти андешидани тадбирҳои муштарак оид ба рушди инфрасохтори наздисарҳадӣ, аз ҷумла марказҳои нақлиётӣ ва ифтитоҳи гузаргоҳҳои нави сарҳадӣ, бо мақсади тавсеаи имконоти пешбурди муносибатҳои тиҷоратию иқтисодӣ таъкид гардид. Бартараф намудани монеаҳои мавҷуда ва сода гардондани расмиёти убури сарҳад, рушди ҳамкорӣ дар соҳаҳои сармоягузорӣ, обу энергетика ва кишоварзӣ, инчунин дар бахши кооператсияи саноатӣ, муҳим дониста шуд.
Дар ин замина, ба фаъол кардани кори сохторҳои байниҳукуматӣ оид ба баррасии тамоми маҷмуи муносибатҳои дуҷониба таваҷҷуҳ зоҳир гардида, масъалаи дар ояндаи наздик баргузор намудани ҷаласаи нахустини Шурои байниҳукуматӣ дар сатҳи сарвазирон мавриди баррасӣ қарор гирифт. Қобили зикр аст, ки қарор дар бораи таъсиси ин Шуро зимни мулоқоту музокироти сатҳи баланд дар Бишкек, дар доираи сафари давлатии Пешвои миллат муҳтарам Эмомалӣ Раҳмон ба Қирғизистон, қабул карда шуд.
Ҷонибҳо, ҳамчунин, ба таҳкими равобити фарҳангиву гуманитарӣ, бахусус дар соҳаҳои илму маориф, фарҳанг, сайёҳӣ ва варзиш, таваҷҷуҳ зоҳир намуданд.
Ҳамчунин, оид ба идомаи ҳамоҳангсозии мавқеъҳои ду кишвар дар доираи созмонҳои байналмилалӣ ва минтақавӣ табодули афкор сурат гирифт.
Музокирот дар фазои ҳамдигарфаҳмӣ ва дар руҳияи созанда баргузор шуд.
МУЛОҚОТИ ЭМОМАЛӢ РАҲМОН БО ШАВКАТ МИРЗИЁЕВ
31-уми март дар шаҳри Хуҷанд мулоқоти Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон бо Президенти Ҷумҳурии Ӯзбекистон муҳтарам Шавкат Мирзиёев баргузор гардид.
Президенти кишвари мо муҳтарам Эмомалӣ Раҳмон меҳмони воломақомро хайрамақдам гуфта, бо Ҷашни байналмилалии Наврӯз табрик намуданд ва аз рушди босуръати муносибатҳои ду давлат дар ҳамаи соҳаҳои ҳамкорӣ изҳори қаноатмандӣ карданд. Густариши фаъолонаи робитаҳои тиҷоратию иқтисодӣ ва фарҳангию гуманитарӣ махсус зикр гардид.
Зимни суҳбат сарварони давлатҳо аҳамияти имзои Аҳдномаи таърихӣ дар бораи муносибатҳои ҳампаймониро таъкид намуда, онро боз як далели равшани дӯстии қавӣ ва дастгирии ҳамдигарии ду давлат номиданд. Ҳар ду роҳбар омодагии худро барои минбаъд низ дар ин руҳия муттасил рушд додани муносибатҳои байнидавлатӣ таъкид намуданд. Зимни суҳбати судманд ба рушди ҳамкории тиҷоратию иқтисодӣ таваҷҷуҳи хосса зоҳир карда шуд.
Ҷонибҳо ҷараёни устувори афзоиши гардиши савдои дуҷонибаро, ки далели иқтидори назарраси мавҷудаи ду кишвар барои афзоиши минбаъдаи он мебошад, зикр карданд.
Афзоиши сармоягузории дуҷониба нишондиҳандаи муҳими густариши ҳамкории иқтисодӣ номида шуд.
Дар ин замина, ба мақсад мувофиқ будани татбиқи лоиҳаҳои муштараки сармоягузорӣ, аз ҷумла дар соҳаҳои саноат, энергетика, кишоварзӣ ва нақлиёт, зикр гардид.
Сарварони ду давлат ба густариши ҳамкории фарҳангиву гуманитарӣ таваҷҷуҳи хосса зоҳир карда, аҳамияти баргузории конфронсҳои илмӣ-амалӣ, форумҳо, фестивалҳо, симпозиумҳо ва мулоқоти зиёиёни эҷодкор ва илмиро таъкид намуданд.
Инчунин, оид ба баъзе масъалаҳои вобаста ба амният, мушкилоти минтақавӣ ва байналмилалӣ табодули афкор анҷом дода шуд.
МАРЗҲОИ СЕ КИШВАР БА МАРЗҲОИ ДӮСТИИ АБАДӢ ТАБДИЛ ХОҲАНД ЁФТ
Суханронии Президенти Ҷумҳурии Тоҷикистон муҳтарам Эмомалӣ Раҳмон дар барномаи фарҳангӣ ба ифтихори Ҷашни байналмилалии Наврӯз,
шаҳри Хуҷанд, 31-уми марти соли 2025
Олиҷанобон муҳтарам Президенти Ҷумҳурии Қирғизистон Жапаров Садир Нургожоевич, муҳтарам Президенти Ҷумҳурии Ӯзбекистон Мирзиёев Шавкат Миромонович!
Меҳмонони олиқадр, ҳозирини гиромӣ!
Бо камоли хушҳолӣ шуморо дар сарзамини Тоҷикистон дар ин рӯзҳои ҷашнӣ хайрамақдам мегӯям.
Ҳамчунин, Шумо ва мардумони ба мо бародару ҳамҷавори Қирғизистону Ӯзбекистон, намояндагони дигар кишварҳои ба мо дӯсту шарикони байналмилалиро, ки имрӯз ба шаҳри бостонии Хуҷанд ташриф овардаанд, ба ифтихори Рӯзи байналмилалии Наврӯз самимона табрик мегӯям. Бо истифода аз ин фурсат, ба тамоми сокинони кишвари азизам беҳтарин орзуҳои худро ба муносибати ин Ҷашни хуҷастапай бори дигар иброз менамоям.
Наврӯз ба якояки Шумо муборак бод!
Басо рамзист, ки вохӯрии мо дар айёми Ҷашни Наврӯзи пуршукӯҳ – намоди бедоршавии табиат, марҳилаи нави гардиши зиндагӣ ва боварӣ ба ояндаи беҳтар сурат мегирад. Ғояву анъанаҳои тағйирнопазири Наврӯз ҳамчун ҷузъи таркибии таъриху фарҳанги мо аз қаъри қарнҳо моро ба таҳкими сулҳу субот, муносибатҳои дӯстӣ ва ҳамкорӣ водор месозанд. Боиси фараҳмандист, ки мардумони мо ҳамеша барои ҳифзу ғанӣ гардондани анъанаҳои неки он – бародарӣ, ризоият, ҳамдилӣ саъю талош карда, онҳоро то ба рӯзҳои мо расондаанд. Ин Ҷашн дар тули асрҳои зиёд барои таҳкими ғояҳои олии башардӯстӣ, фазои эҳтироми муштарак ва созгорӣ хизмат менамояд.
Кишварҳо ва мардумони моро риштаҳои мустаҳками дӯстии танготанг, накуҳамсоягӣ ва рушди муштарак ба ҳам мепайванданд. Комилан возеҳ аст, ки имрӯз ҳам талошҳои муштараки мо ба он равона шудаанд, ки ин таҷрибаи созандаи таърихиро пурра ба нафъи наслҳои имрӯзаву оянда истифода барем. Рушди ҳамаҷонибаи ҳамкории зичи мурдумону давлатҳои мо дар ҳамаи соҳаҳои манфиатҳои муштарак яке аз самтҳои афзалиятноки сиёсати хориҷии Тоҷикистон мебошад. Маҳз барои ҳамин ҳам натиҷаҳои вохӯриҳои имрӯзаро мо ҳамчун пайки таҷдид ва оғози марҳилаи сифатан нав дар муносибатҳои се кишвар медонем.
Имрӯз мо санади таърихӣ – Аҳднома оид ба нуқтаи пайвастшавии марзҳои давлатии се кишварро ба имзо расондем. Ҳамин тавр, мо бори дигар қатъиян эълон намудем, ки аз арзишҳои сулҳ ва усулҳои ҳалли ҳамаи масъалаҳои мавҷуда аз роҳи муколама, дар руҳияи ҳусни ҳамҷаворӣ, ҳамдигарфаҳмӣ, самимият, эҳтиром ва эътимоди ҳамдигар пуштибонӣ мекунем.
Бовар дорам, ки аз имрӯз эътиборан марзҳои се кишвар ба марзҳои дӯстии абадӣ, ҳамсоягии воқеан нек ва шарикии созанда табдил хоҳанд ёфт. Он ҳам боиси итминон аст, ки мувофиқаҳои имрӯз ҳосилшуда, бешубҳа, омили муҳими рушду таъмиқи минбаъдаи муносиботи байнидавлатӣ ва ҳамкории мо дар соҳаҳои сиёсӣ, иқтисодӣ, фарҳангиву башарӣ ва дигар арсаҳои манфиатҳои муштарак хоҳанд шуд. Ин ниёзмандиҳои табиии мардумони се кишвар аст ва мо вазифадорем, ки минбаъд низ дар ин самт саъю талоши муштарак ба харҷ диҳем. Рушди пайвастаи муносибатҳои кишварҳоямон ба манфиатҳои аслии мардумони мо ҷавобгӯ буда, ба таҳкими сулҳу субот ва шукуфоии тамоми минтақа мусоидат хоҳад кард.
Бовар дорам, ки мо дар якҷоягӣ, бо дастгирии доимии мардумонамон, дар ин ҷода ба дастовардҳои бузург ноил хоҳем гашт.
Бори дигар Шуморо, муҳтарам Садир Нургожоевич ва Шавкат Миромонович, инчунин, ҳамаи меҳмонони азизамонро ба Тоҷикистон самимона хайрамақдам мегӯям. Ба ҳамаи шумо саломатии бардавом, хушбахтиву беҳрӯзӣ ва ба кишварҳоямон сулҳу амонӣ, рушд ва пешрафти минбаъда орзу менамоям.
Дӯстӣ ва бародарии мардумонамон ҷовидону бегазанд бод!
Аз таваҷҷуҳатон сипосгузорам!
МУЛОҚОТИ СЕҶОНИБАИ САРВАРОНИ ДАВЛАТҲОИ ТОҶИКИСТОН, ҚИРҒИЗИСТОН ВА ӮЗБЕКИСТОН
31-уми март дар шаҳри Хуҷанди бостонӣ мулоқоти сеҷонибаи сарварони давлатҳои Тоҷикистон, Қирғизистон ва Ӯзбекистон баргузор шуд.
Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон меҳмонони воломақомро самимона истиқбол намуданд ва маросими аксбардории муштараки сарварони давлатҳои Тоҷикистон, Қирғизистон ва Ӯзбекистон баргузор гардид. Дар оғози мулоқот Президенти кишвари мо муҳтарам Эмомалӣ Раҳмон сарварони давлатҳои ҳамсояро самимона хайрамақдам гуфта, бори дигар онҳоро бо Ҷашни байналмилалии Наврӯз табрик намуданд ва изҳор доштанд, ки «ин Ҷашн давоми ҳазорсолаҳо барои таҳкими ҳадафҳои баланди инсондӯстӣ ва эҳтироми ҳамдигар, ҳамбастагӣ ва ризоият хизмат намудааст».
Муҳтарам Эмомалӣ Раҳмон таъкид карданд: «Кишварҳо ва мардумони моро риштаҳои қавии дӯстии бисёрсола, накуҳамсоягӣ ва рушди муштарак бо ҳам мепайванданд».
– Мо дар Тоҷикистон муносибатҳоро бо Қирғизистон ва Ӯзбекистон, ки бар пояҳои накуҳамсоягӣ, баробарҳуқуқӣ, эҳтиром ва бо назардошти манфиатҳои ҳамдигар асос ёфтаанд, баҳои баланд медиҳем, – зикр намуданд Пешвои миллат зимни суханронӣ. Дар идома Сарвари давлати мо рушди ҳамаҷонибаи муносибатҳои се кишварро яке аз самтҳои афзалиятноки сиёсати хориҷии Тоҷикистон номиданд.
Президенти давлати мо муҳтарам Эмомалӣ Раҳмон баимзорасии Шартнома миёни Ҷумҳурии Тоҷикистон, Ҷумҳурии Қирғизистон ва Ҷумҳурии Ӯзбекистон дар бораи нуқтаи пайвастшавии сарҳадҳои давлатии се кишварро рӯйдоди бисёр муҳим арзёбӣ намуданд.
Муҳтарам Эмомалӣ Раҳмон аз натиҷаҳои пурсамари сафари давлатии ба наздикӣ анҷомёфтаи худ ба Қирғизистон изҳори қаноатмандӣ карда, иброз доштанд, ки ҷониби Тоҷикистон азм дорад дар давраи оянда тамоми кӯшишҳоро барои фароҳам овардани заминаи зарурӣ ҷиҳати ҳамкории гуногунҷанбаи созандаи ду кишвар равона намояд. Сарвари давлати мо аз имзои Шартнома дар бораи муносибатҳои ҳампаймонӣ ва табодули тасдиқномаҳо оид ба он изҳори қаноатмандӣ намуданд ва таъкид доштанд, ки бо имзои ин санади таърихӣ дар муносибатҳои Тоҷикистону Ӯзбекистон марҳалаи сифатан нави рушд оғоз ёфт. Дар идома муҳтарам Эмомалӣ Раҳмон зикр намуданд: «Мо ба ояндаи шарикии стратегӣ ва ҳампаймонии Тоҷикистону Ӯзбекистон хушбинии баланд дорем».
Дар фарҷоми суханронӣ Сарвари давлати мо муҳтарам Эмомалӣ Раҳмон изҳори итминон намуданд, ки натиҷаҳои мулоқоти имрӯзаи роҳбарони се кишвари ҳамсоя ба таҳкими минбаъдаи дӯстӣ, муносибатҳои накуҳамсоягӣ, ҳамдигарфаҳмӣ, эҳтиром ва эътимоди мутақобил, инчунин, ҳамкории созандаву муассир миёни кишварҳоямон ва мардумони бародар мусоидат менамоянд.
МАРОСИМИ ИМЗОИ САНАДҲОИ СЕҶОНИБА
Пас аз анҷоми музокироти сеҷониба маросими имзои Шартнома миёни Ҷумҳурии Тоҷикистон, Ҷумҳурии Қирғизистон ва Ҷумҳурии Ӯзбекистон дар бораи нуқтаи пайвастшавии сарҳадҳои давлатии се кишвар ва Эъломияи Хуҷанд доир ба дӯстии абадӣ баргузор гардид.
Санадҳои муҳими таърихӣ – Шартнома миёни Ҷумҳурии Тоҷикистон, Ҷумҳурии Қирғизистон ва Ҷумҳурии Ӯзбекистон дар бораи нуқтаи пайвастшавии сарҳадҳои давлатии се кишвар ва Эъломияи Хуҷанд доир ба дӯстии абадӣ дар фазои тантанавӣ аз ҷониби сарварони давлатҳо муҳтарам Эмомалӣ Раҳмон, муҳтарам Садир Жапаров ва муҳтарам Шавкат Мирзиёев ба имзо расид.
Сипас, роҳбарони давлатҳо дар маросими ифтитоҳи фосилавии стелаи (сутуни) рамзӣ дар нуқтаи пайванди сарҳадҳои давлатии Тоҷикистон, Қирғизистон ва Ӯзбекистон иштирок намуданд.
Бо ризояти сарварони давлатҳо аз ҷониби намояндагони масъули ҷонибҳо иншооти рамзӣ дар фазои тантанавӣ ифтитоҳ ёфт.
Садои мусиқӣ дар майдони ифтитоҳи иншоот бо истифода аз карнай, сурнай ва дигар созҳои миллӣ ба маросим шукӯҳи хосса бахшид.
МАРОСИМИ БА КОР АНДОХТАНИ ХАТТИ ИНТИҚОЛИ БАРҚИ 500 КВ «ДАТКА – СУҒД»-И ЛОИҲАИ CASA-1000
Баъд аз анҷоми мулоқоти хоссаи сарварони давлатҳои Тоҷикистону Қирғизистон маросими имзои санади таърихӣ – Протоколи мубодилаи тасдиқномаҳои Шартнома миёни Ҷумҳурии Тоҷикистон ва Ҷумҳурии Қирғизистон дар бораи сарҳади давлатии Тоҷикистону Қирғизистон, инчунин, ду созишномаи байниҳукуматӣ – «Дар бораи таъмини дастрасӣ ба объектҳои хоҷагии об ва энергетикӣ» ва «Дар бораи сохтмон ва истифодабарии роҳҳои мошингард, ободонӣ ва истифодаи чорроҳаи мошингард» баргузор гардид.
Баъди табодули Протоколи мубодилаи тасдиқномаҳо Президенти Ҷумҳурии Тоҷикистон муҳтарам Эмомалӣ Раҳмон ва Президенти Ҷумҳурии Қирғизистон муҳтарам Садир Жапаров ба таври фосилавӣ хатти интиқоли барқи 500 кВ “Датка – Суғд”-ро, ки дар доираи татбиқи лоиҳаи CASA-1000 сохта шудааст, мавриди истифода қарор доданд.
МАРОСИМИ ИМЗОИ ПРОТОКОЛИ МУБОДИЛАИ ТАСДИҚНОМАҲОИ АҲДНОМА
Баъди анҷоми мулоқоти хоссаи сарварони давлатҳои Тоҷикистону Ӯзбекистон, ки дар фазои дӯстию бародарӣ ҷараён гирифт, дар ҳамин ҷо маросими имзо ва мубодилаи санади муҳими таърихӣ – Протоколи мубодилаи тасдиқномаҳои Аҳднома миёни Ҷумҳурии Тоҷикистон ва Ҷумҳурии Ӯзбекистон дар бораи муносибатҳои ҳампаймонӣ баргузор шуд.
Санади мазкур дар ҳузури сарварони давлатҳо аз ҷониби вазирони корҳои хориҷии ду кишвар ба имзо расид.
БАРНОМАИ ФАРҲАНГИИ МУШТАРАКИ НАВРӮЗӢ
Бегоҳии 31-уми март муҳтарам Эмомалӣ Раҳмон, муҳтарам Садир Жапаров ва муҳтарам Шавкат Мирзиёев дар тантанаҳои Ҷашни байналмилалии Наврӯз, ки дар варзишгоҳи «20-солагии Истиқлолияти Тоҷикистон» бо барномаи муштараки фарҳангии аҳли ҳунари се кишвар баргузор гашт, иштирок намуданд.
Президенти Ҷумҳурии Тоҷикистон муҳтарам Эмомалӣ Раҳмон зимни суханронӣ дар маросими тантанавӣ меҳмонони олимақом – сарварони давлатҳои Қирғизистону Ӯзбекистон, мардумони ҳар се кишвар, инчунин, намояндагони дигар давлатҳои дӯст ва шарикони байналмилалиро, ки ба Хуҷанди бостонӣ ба ин муносибат ташриф овардаанд, бо Ҷашни байналмилалии Наврӯз самимона табрик намуданд.
Пешвои миллат муҳтарам Эмомалӣ Раҳмон дар бораи мақом ва расму оини устувори Наврӯз ҳарф зада, изҳор доштанд, ки ин Ҷашн ҳамчун ҷузъи таркибии таъриху фарҳанги мо аз қаъри қарнҳо моро ба таҳкими сулҳу субот, муносибатҳои дӯстӣ ва ҳамкорӣ водор месозад.
Сарвари давлати мо инро низ «комилан возеҳ» номиданд, ки имрӯз ҳам талошҳои муштараки мо ба истифодаи ҳамаҷонибаи асосҳои башардӯстӣ ва рамзҳои олии Ҷашни таърихии Наврӯз ба нафъи наслҳои имрӯзаву оянда равона шудаанд.
Президенти кишвари мо муҳтарам Эмомалӣ Раҳмон Шартномаи байни Ҷумҳурии Тоҷикистон, Ҷумҳурии Қирғизистон ва Ҷумҳурии Ӯзбекистон дар бораи нуқтаи пайвастшавии сарҳадҳои давлатии се кишвар баимзорасидаро «санади таърихӣ» номида, таъкид доштанд: «Ҳамин тавр, мо бори дигар қатъиян эълон намудем, ки аз арзишҳои сулҳ ва усулҳои ҳалли ҳамаи масъалаҳои мавҷуда аз роҳи муколама, дар руҳияи ҳусни ҳамҷаворӣ, ҳамдигарфаҳмӣ, самимият, эҳтиром ва эътимоди ҳамдигар пуштибонӣ мекунем». Дар идома муҳтарам Эмомалӣ Раҳмон изҳори итминон намуданд: «Аз имрӯз эътиборан марзҳои се кишвар ба марзҳои дӯстии абадӣ, ҳамсоягии воқеан нек ва шарикии созанда табдил хоҳанд ёфт».
Сарвари давлати мо тавофуқоти бадастомадаро азми табиии мардумони се кишвар арзёбӣ намуда, таъкид доштанд: «Мо вазифадорем, ки минбаъд низ дар ин самт саъю талоши муштарак ба харҷ диҳем».
Сарварони давлатҳои Қирғизистон муҳтарам Садир Жапаров ва Ӯзбекистон муҳтарам Шавкат Мирзиёев низ ба муносибати Ҷашни Наврӯз бо табрикот ва таманниёти нек суханронӣ карданд. Сипас, тантанаҳои бошукӯҳ ба ифтихори Ҷашни байналмилалии Наврӯз бо барномаи пурмуҳтавои фарҳангии ҳунармандон ва гурӯҳҳои эҷодии Тоҷикистон, Қирғизистон ва Ӯзбекистон идома ёфт, ки намунаи наздикии маънавию фарҳангии мардумони се кишвар гардид. Барномаи ҳунарӣ, ки мазмунан фарогири савту навои дӯстиву бародарӣ ва накуҳамсоягӣ буд, ба намунаи возеҳи некхоҳиву накусириштӣ табдил ёфт.
БОЗДИД АЗ МАҶМААИ ҚАЛЪАИ ХУҶАНД
31-уми март Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ва меҳмонони олиқадри тантанаҳои наврӯзӣ муҳтарам Садир Жапаров ва муҳтарам Шавкат Мирзиёев ба Маҷмааи Қалъаи Хуҷанд ташриф оварда, бо иншооти муҳташами фарҳангӣ ва намоиши маҳсули дасти ҳунармандони тоҷик, қирғиз ва ӯзбек шинос шуданд.
Дар даромадгоҳи қалъа меҳмононро гурӯҳи кӯдакон бо намоиши бозиҳои гуногуни варзишӣ, ки хоси Ҷашни Наврӯз мебошад, истиқбол гирифтанд.
Баробари расидани сарварони кишварҳои Тоҷикистон, Қирғизистон ва Ӯзбекистон ба қалъа гурӯҳи карнайнавозон ва дойразанон аз болои растаҳои ҳунармандӣ меҳмононро пешвоз гирифта, фазои дилкушои наврӯзӣ фароҳам намуданд.
Даромадгоҳи Қалъаи Хуҷанд ва ҳам саҳни он бо парчамҳои давлатии се кишвар, аксҳои роҳбарони давлатҳо, шиору овезаҳои тараннумгари дӯстии мардумон ва дигар ороишоти хоси наврӯзӣ зебу зинат ёфта буданд.
Дар назди дарвозаи қалъа бо либосҳои миллӣ ҷавондухтарон бо забонҳои тоҷикӣ, қирғизӣ ва ӯзбекӣ меҳмононро хайрамақдам гуфтанд.
Дар тарафи рости даромадгоҳи наврӯзгоҳ деги калони суманак қарор дошт. Сарварони давлатҳо бо кофтани суманак ба ин оини наврӯзӣ арҷгузорӣ намуданд.
Дар саҳни ҳавлии базмгоҳ ҳунармандони се кишвар, ҷавонону кӯдакони хуштолеъ бо либосҳои зебои миллии ҳар се давлат меҳмонони олимақомро самимона истиқбол гирифтанд.
Дар суҳбаткадаҳои зебову мунаққаши қалъа аҳли санъати се кишвар, мутрибон, аз ҷумла ҷавондухтарони дуторнавоз ва шашмақомсаро, бо навозиши фораму дилнишин табъи меҳмононро болида сохтанд. Саҳни назди даромадгоҳи Осорхонаи таърихии қалъа низ идона оро ёфта буд. Дар даромадгоҳи Осорхона роҳбалад меҳмононро гарму самимӣ истиқбол гирифта, ба онҳо нигораҳои нодир ва нақшу нигорро муаррифӣ намуд.
Шиору овезаҳо ва суханҳои ҳикматомези бузургони илму адаби тоҷик ва қирғизу ӯзбек, ки дар он ҷо ба назар мерасид, тараннумгари дӯстию бародарии мардумони се кишвари ҳамсоя аст.
Меҳмонон дар ин ҷо аз чор толори Осорхона дидан карда, бо таъриху тамаддуни ғанӣ ва қадимаи мардуми тоҷик ошноӣ пайдо намуданд. Дар яке аз толорҳо тавассути монитор ва пахши навор оид ба таърихи Қалъаи Хуҷанд маълумот дода шуд.
Бояд гуфт, ки асоси ороишоти толорҳои Осорхонаро санъати миллии меъмории тоҷик, ба монанди кандакорӣ, наққошӣ, кундалкорӣ, коркарди бадеии чӯб, санг, гачкорӣ ва кошинкорӣ ташкил медиҳад, ки бо маҳорати баланд таҳия шудааст.
Баъди шиносоӣ бо нақшу нигори толорҳои Осорхона сарварони давлатҳо дар саҳни ҳавлӣ аз намоиши хӯрокҳои миллӣ ва шириниҳо боздид намуданд. Дар ин намоиш ҳафт сину ҳафт шин ва ҳафт мим, намудҳои гуногуни шириниву хӯришҳо ба маъраз гузошта шуданд.
Дар даромадгоҳи маҳаллаи ҳунармандон кӯдакон барои пазироии меҳмонони олимақом сурудҳои сияҳгӯшу бойчечак замзама карданд.
Дар ҳар як ҳавлии маҳаллаи қадимаи қалъа намоиши ҳунарҳои миллӣ ва фолклории сокинони минтақаҳои гуногуни Тоҷикистон ба назар мерасид.
Меҳмонон аз маҳаллаи ҳунармандон, бахусус хонаи наққошон ва қолинбофон, дидан намуда, бо анъанаҳои ниёгони мардуми тоҷик шинос шуданд. Дар рафти боздид ба роҳбарони давлатҳо оид ба таърих ва пайдоиши ҳар як намуди ҳунарҳои мардумӣ, ки то имрӯз ҳифз шудааст, маълумот дода шуд.
Дар чойхонаи миллӣ иҷрои ҳунари волои кандакорӣ, гачкорӣ, кундалнигорӣ ва наққошии бемисл ба зебоии бино шукӯҳи хос бахшидааст.
Дар растаи таомҳои миллӣ ва нонҳо меҳмонон ба таомҳои миллии тоҷикӣ, қирғизӣ ва ӯзбекӣ, аз ҷумла ба санъати баланди тайёр кардани оши палов, таваҷҷуҳ намуда, баъди суҳбат ба ошпазҳо баҳои баланд доданд.
Дар намоишгоҳи калони ҳунармандон, ки аз ҷониби устоҳои гулдаст ва доираҳои гуногуни аҳли фарҳанги давлатҳо таҳия шуда буд, сарварони давлатҳо бо намунаҳои мухталифи маҳсули дасти устоҳои чирадаст, косибон ва заргарони Тоҷикистон ва Қирғизистону Ӯзбекистон шинос шуданд.
Барои меҳмонони олимақоми Қалъаи Хуҷанд аз ҷониби ҳунармандон, аҳли фарҳанги давлатҳои Тоҷикистон ва Қирғизистону Ӯзбекистон намоиши театрӣ таҳти унвони “Меҳрнома” манзур гардид.
ГУСЕЛИ САРВАРОНИ ДАВЛАТҲОИ ҚИРҒИЗИСТОН ВА ӮЗБЕКИСТОН
Шоми 31-уми март пас аз иштирок дар чорабиниҳои фарҳангӣ ба ифтихори Ҷашни байналмилалии Наврӯз ва анҷоми сафари корӣ дар Ҷумҳурии Тоҷикистон сарварони давлатҳои Қирғизистону Ӯзбекистон муҳтарам Садир Жапаров ва муҳтарам Шавкат Мирзиёев аз шаҳри Хуҷанд ба ватанашон баргаштанд.
Дар Фурудгоҳи байналмилалии Хуҷанд меҳмонони олимақомро Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон самимона гусел намуданд.
