ҲУҚУҚИ КӮДАК. ҚОНУНЕ, КИ КӮДАКОНРО АЗ ИТТИЛОИ ЗАРАРОВАР ҲИФЗ МЕКУНАД

Дар ҷаласаи навбатии иҷлосияи якуми Маҷлиси намояндагони Маҷлиси Олии Ҷумҳурии Тоҷикистон даъвати ҳафтум Қонуни Ҷумҳурии Тоҷикистон “Оид ба ворид намудани иловаҳо ба Қонуни Ҷумҳурии Тоҷикистон “Дар бораи ҳифзи ҳуқуқҳои кӯдак” баррасӣ гардида ба тасвиб расид.

Раҳим Саидзода, вазири маориф ва илми Ҷумҳурии Тоҷикистон, зимни баррасии мавзуъ иброз дошт, ки мақсад аз ворид намудани иловаҳо ба Қонуни Ҷумҳурии Тоҷикистон “Дар бораи ҳифзи ҳуқуқҳои кӯдак”, ин ҳифз намудани кӯдак аз иттилооти ба саломатӣ ва ё инкишофи ӯ зараровар буда, бо тартиби муқаррарнамудаи қонунгузории Ҷумҳурии Тоҷикистон амалӣ карда мешавад.

– Қонуни мазкур бо ҳадафи ҳифзи кӯдак аз иттилооти ба саломатӣ ва инкишофи ӯ зараровар, ки нишондиҳандаи иҷрои уҳдадориҳои байналмилалии Ҷумҳурии Тоҷикистон дар доираи талаботи Конвенсия оид ба ҳуқуқи кӯдак ва протоколҳои иловагии он мебошад, таҳия гардидааст, – гуфт Мунаввар Абдусаломзода, узви кумитаи Маҷлиси намояндагон оид ба масъалаҳои иҷтимоӣ, оила ва ҳифзи саломатӣ.

Шодмон АБДУРАҲИМ, “Ҷумҳурият”