ДАРВОЗ Авлавият ба тавсеаи майдони заминҳои кишт

Воқеан, хушоянд аст, ки дар ноҳияи Дарвоз аз ҷониби масъулин, пеш аз ҳама, мутахассисони соҳибтаҷриба роҳу усулҳои зиёд намудани масоҳати киштзорон ва боғот ҷустуҷӯй карда мешавад, то кишоварзони ин ноҳияи кӯҳистон низ дар таъмини амнияти озуқавории кишвар саҳми муносиб гузошта тавонанд.

Бо ҳамин ниятҳои нек хоҷагиҳои деҳқонӣ ва хусусии ноҳия дар заминҳои солҳои дароз бекорхобида бо гузашти чандин солҳо бори аввал дар майдони қариб 60 гектар гандуми тирамоҳӣ кишт карданд. Ёдовар мешавем, азбаски ин минтақа ба мисли вилояти Хатлон гарм аст, дар ин рӯзҳои моҳи декабр ҳам шуд­гор ва кишти заминҳо ҷараён дорад.

Мавриди ёдоварист, ки дар натиҷаи амалисозии тадбирҳои Ҳукумати мам­лакат дар даврони соҳибистиқлолӣ дар вилоят майдони 2318 гектар, аз ҷумла дар ноҳияи Дарвоз 250 гектар замини нав кушода шуд.

Дар ин хусус, раиси ноҳияи Дарвоз Умедҷон Носирзода бо қаноатмандӣ гуфт, ки бо дастгирии Пешвои муаззами мил­лат ва маблағгузориҳои Ҳукумати киш­вар, ёрии Мақомоти иҷроияи маҳаллии ҳокимияти давлатии Вилояти Мухтори Кӯҳистони Бадахшон ва шарикони рушд заминкушоиҳо ва беҳтар кардани ҳолати мелиоративии киштзорон дар ҳудуди ҷамоатҳои деҳоти Сағирдашт, Нулванд, Қалъаихумб ва Вишхарв ба таври назар­рас ба ҷо оварда шуданд. Аз ҳама ка­лонтарин киштзорони навбунёд даштҳои Мурғобӣ, Мазор, Луч, Ёвон, Роғак, Ёгеду Курговад ва дигар тагдаштҳои хурдтар дар шафати шоҳроҳи байналмилалии ав­томобилгарди Душанбе – Кӯлоб – Дарвоз – Хоруғ – Мурғоб – Кулма мебошанд.

Раиси ноҳия иброз дошт, ки, мута­ассифона, на ҳамаи ин масирҳои бо заҳмати зиёд ва истифодаи техника ва маблағҳо азхудкардашуда чандин солҳо самаранок ва мақсаднок истифода бур­да мешуданд. Аз беназоратӣ як қисми ин заминҳо дигарбора ба хорзор ва рӯиши дигар рустанӣ ва гиёҳҳои ёбоӣ табдил ёфта буданд. Тирамоҳи имсола ба чунин бемасъулиятӣ ва камбудиҳо аз ҷониби Мақомоти иҷроияи маҳаллии ҳокимияти давлатии ноҳияи Дарвоз хотима дода шуд. Боронҳои саривақтии тирамоҳӣ, ки сабаби нарм гаштани хоки киштзорон гардид, шароит фароҳам овард, ки дар бештар аз 60 гектар заминҳои бекорхоби­да гандуми тирамоҳӣ кошта шавад. Тибқи нақша-чорабиниҳо, фасли баҳорон дар як қатор заминҳои даштҳо ва тагдаштҳо низ зироатҳои ғалладонагӣ ва картошкаву сабзавот кошта, домони боғҳо низ васеъ­тар гардонда мешаванд.

Бояд гуфт, ки солҳои пеш аз заминҳои бештар аз 120-гектараи Дашти Ёвони ҳудуди деҳоти Нулванд сокинони деҳот ҳосили баланди зироатҳои ғалладонагӣ, картошкаву сабзавот ва садҳо тонна хо­шок ба даст меоварданд. Мутаассифона, солҳои гузашта як қисми заминҳо нокиш­та мемонданд. Сабабаш он аст, ки роҳи ҷониби Дашти Ёвон таъмирталаб аст, нархи сӯзишворӣ ва поруҳои органикӣ низ хеле баланд мебошад. Мақомоти иҷроияи маҳаллии ҳокимияти давлатии ноҳияи Дарвоз ва дигар ниҳодҳои мададрасон тасмим гирифтанд, ки маблағҳои зару­риро ҷудо карда, ин роҳи баландкӯҳиро тахту ҳамвор намоянд ва боз аз сари нав заминҳои ҳосилхези Дашти Ёвон дар Танг­нои Дарвоз саросар кишт карда шаванд.

Ҳамзамон, ба гуфти раиси ноҳия, дар Дарвоз чандин деҳкадаҳое, ба мисли Равнов, Удун, Хоб, Рубот, Сафедсанг, Вастан, Амшун, Уғр ва дигар маконҳои замоне аҳолинишин ҳастанд, ки заминҳои ҳосилхез ва боғистонҳо доранд, вале соҳибонашон ин маконҳоро солҳои панҷоҳуми асри гузашта тарк кардаанд. Бовар аст, ки давра ба давра ин ҷойҳо аз нав обод ва заминҳояшон кишт мешаванд, боғҳо бунёд мегарданд. Дар натиҷа, Дарвози камзамин ба минтақаи серзамини вилоят ва кишвар табдил меёбад.

Муҳаммадзоиршо ШАРИФЗОДА, “Ҷумҳурият, 

Сироншоҳи ДИЛОВАР, рӯзноманигор