ҶУДО.  IJF ЧЕМПИОНАТИ ҶАҲОНИИ ҶАВОНОН ДАР ДУШАНБЕРО СИТОИШ КАРД

Директори кулли варзишии Федератсияи байналмилалии ҷудо (IJF) Владимир Барта аз сатҳи ташкилии Чемпионати ҷаҳонии ҷудо миёни ҷавонон-2024, ки рӯзҳои 2-6-уми октябр дар шаҳри Душанбе баргузор шуд, ситоиш кард.
“Тадорукот дар ин ҷо аҷиб буд. Ҳар рӯз, вақте ки мо саҳар ба макони баргузории чорабинӣ меомадем, он пур буд ва издиҳом хеле хуб идора мешуд. Новобаста ба миллат, барабанбозон ва мухлисон ба варзишгарон руҳияи баланд доданд ва мо мешунидем, ки онҳо барои Бразилия, Ӯзбекистон, барои миллатҳои хурд ва ҳатто барои довар шодӣ мекунанд. Ин руҳияро эҳсос кардан хеле бузург аст”, – гуфт Барта.
Вай, ҳамчунин, Тоҷикистонро ба унвони як кишвари рӯ ба тараққӣ дар ҷудо, ки дар Париж-2024 ду медали олимпӣ ба даст овард, эътироф кард.
"Ҷудо дар Тоҷикистон пас аз Гран-прии Душанбе дар соли 2023 пурқувват шудааст ва ҳоло онҳо ду медали олимпӣ доранд, то ба медали биринҷии Расул Боқиев дар соли 2008 илова кунанд. Мо метавонем ба сатҳи баланди рушди ҷудо дар ин кишвар бовар кунем, аввал Гран-при, пас аз як сол Гранд слам ва ҳоло чемпионати ҷаҳонии ҷавонон. Тоҷикистон дар ҳақиқат кишвари ҷудо аст ва мо ҳис мекунем, ки ҳама дар ин ҷо омодаанд, таҷриба омӯзанд ва чорабинии афсонавиро пешкаш намоянд.
Ба гуфтаи Барта, сабки ҷудо, бидуни тактикаи зиёд, дар чемпионати ҷаҳон байни ҷавонон кушода буд, ҳарчанд бархе аз варзишгарон дар Бозиҳои олимпӣ зӯрозмоӣ карданд, аммо ин чорабинӣ нишон дод, ки ҷудочиён ба синну соли худ мувофиқ ба давраи навбатии олимпӣ омода бошанд, то боло раванд ва дар Бозиҳои олимпии Лос Анҷелес-2028 рақобат кунанд.
В. Барта, инчунин, аз паҳлавонони пурқуввати Осиёи Марказӣ ёдовар шуд: “Онҳо аз ҷиҳати ҷисмонӣ баркамоланд. Аз кишварҳои анъанавии муваффақ, ба монанди Ҷопон ва Корея низ муваффақиятро дидем. Ҷопон ба таври таъсирбахш бартарӣ дорад. Умуман, қораи Осиё хеле хуб баромад кард”.

Таҳияи Умаралӣ САФАРАЛӢ, “Ҷумҳурият”