ҶУМҲУРИЯТ » ҶАЛАСАҲО » ИТТИЛОИЯ

ИТТИЛОИЯ

01 июл 2024, Душанбе
16
0
 
28-уми июн таҳти раёсати Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон, Раиси Ҳукумати Ҷумҳурии Тоҷикистон муҳтарам Эмомалӣ Раҳмон маҷлиси Ҳукумати Ҷумҳурии Тоҷикистон баргузор гашт.
 
Дар он, нахуст, оид ба Барномаи давлатии кабудизоркунии Ҷумҳурии Тоҷикистон барои давраи то соли 2040 ҳисоботи раиси Кумитаи ҳифзи муҳити зист Баҳодур Шерализода шунида шуд.
Таъкид рафт, ки Барномаи мазкур бо мақсади амалӣ намудани чорабиниҳо дар самти шинондани дарахту буттаҳо дар шаҳру ноҳияҳои кишвар таҳия гардида, ба коҳиш додани газҳои гулхонаӣ, барқарорсозии ҳолати экологии ҳавои атмосфера, нигоҳдории устувори тавозуни табиӣ, мутобиқшавӣ ба равандҳои тағйирёбии иқлим ва ғайра нигаронда шудааст.
Баъди баррасии масъала Барномаи давлатӣ тасдиқ гардид ва Сарвари давлат муҳтарам Эмомалӣ Раҳмон ба вазорату идораҳои дахлдор, мақомоти иҷроияи ҳокимияти давлатии вилоятҳо ва шаҳру ноҳияҳо супориш доданд, ки барои татбиқи пурсамари он тадбирҳои мушаххас андешанд. Аз ҷумла, таъкид гардид, ки шумораи хоҷагиҳои ниҳолпарварӣ зиёд ва самараи кори онҳо беҳтар шавад.
Дар идомаи маҷлис доир ба нақшаи кори Ҳукумати Ҷумҳурии Тоҷикистон дар нимсолаи дуюми соли 2024 ва Ҳисобот оид ба заминҳои мавҷуда, тақсимоти онҳо аз рӯйи гурӯҳҳо, намудҳо  ва заминистифодабарандагони кишвар ба ҳолати 1-уми январи соли 2024 шахсони масъул гузориш доданд.
Лоиҳаҳои як қатор қонунҳои Ҷумҳурии Тоҷикистон, аз ҷумла Қонуни Ҷумҳурии Тоҷикистон “Оид ба ворид намудани тағйиру илова ба Қонуни Ҷумҳурии Тоҷикистон “Дар бораи Агентии назорати давлатии молиявӣ ва мубориза бо коррупсияи Ҷумҳурии Тоҷикистон” ва Қонуни Ҷумҳурии Тоҷикистон “Оид ба ворид намудани тағйиру илова ба Қонуни Ҷумҳурии Тоҷикистон “Дар бораи пешгирии зӯроварӣ дар оила” муҳокима ва барои баррасӣ ба Маҷлиси намояндагони Маҷлиси Олӣ ирсол шуданд. 
Ҳамчунин, масъалаҳо дар бораи стратегияи рушди Муассисаи давлатии “Донишгоҳи байналмилалии сайёҳӣ ва соҳибкории Тоҷикистон” барои давраи то соли 2040 ва таъсиси донишкадаҳои байналмилалии Муассисаи давлатии “Донишгоҳи байналмилалии сайёҳӣ ва соҳибкории Тоҷикистон” дар вилоятҳои Хатлон ва Суғд матраҳ гашт.
Дар фароварди маҷлис Президенти кишвар муҳтарам Эмомалӣ Раҳмон ба аъзои Ҳукумати Ҷумҳурии Тоҷикистон ҷиҳати иҷрои масъалаҳои рӯзномаи маҷлиси навбатӣ супоришҳои мушаххас доданд. Дастурҳои дигар доир ба ҷамъоварии муташаккилонаи ҳосили ғалладонаиҳо, суръат бахшидан ба кишти такрорӣ дар заминҳои обӣ, сари вақт ва беталаф ҷамъ овардани меваю сабзавот ва содироти он, омодагӣ ба тирамоҳу зимистони дарпешистода, бунёду таъмири муассисаҳои таълимӣ ва омодагии ҳамаҷониба ба соли нави хониш ва вусъат бахшидан ба корҳои ободонӣ ҷиҳати истиқболи сазовори Ҷашни 35-солагии Истиқлоли давлатӣ дода шуданд.
 
Санаи нашр: 01.07.2024 №: 123
Муҳокима кунед
Эзоҳ илова кунед
Шарҳҳо (0)
Шарҳ
Кликните на изображение чтобы обновить код, если он неразборчив