МУДИРИЯТ

17 сентябр 2024, Сешанбе

Дилшод Назаров – раиси Кумитаи варзиш барои ҳамаи ОСА

Дар 44-ум ҷаласаи Ассамблеяи генералии Шурои олимпии Осиё (OCA) дар Деҳлӣ (Ҳиндустон) ноиби президенти Кумитаи миллии олимпии Тоҷикистон, чемпиони Бозиҳои олимпӣ Дилшод Назаров раиси Кумитаи варзиш барои ҳама, ҳамзамон, узви Кумитаи иҷроияи OCA интихоб шуд.

Дар ҷаласа Роҷа Рандҳир Сингҳи ҳинд, ки то ин вақт ноиби аввали президенти ОСА буд, барои солҳои 2024-2028 президенти OCA интихоб гашт. Номзадҳо дар мансаби президент, панҷ ноиби президент ва панҷ узви Кумитаи иҷроия бидуни рақиб буданд.

Тимоти Фок (Ҳонконг, Чин), Норза Закария (Малайзия), Ҷиҷел Уген Ванчук (Бутан), Тани ал-Кувари (Қатар), Отабек Умаров (Ӯзбекистон) ноибони президенти OCA интихоб гардиданд.

ВОЛЕЙБОЛ

Ҷойи сеюми тими бонувони Тоҷикистон дар Ҷоми даъвати CAVA

Тими мунтахаби волейболи бонувони кишвар дар Ҷоми даъвати Ассотсиатсияи волейболи Осиёи Марказӣ (CAVA) медали биринҷӣ гирифт.

Мусобиқа 6-11-уми сентябр дар Малдив баргузор шуд. Дар он дастаҳои Тоҷикистон, Малдив, Афғонистон ва Қирғизистон ширкат доштанд.

Волейболбозони тоҷик дар нимфинал аз тими Қирғизистон, ки ғолиби мусобиқа шуд, мағлуб гашта, дар бозӣ барои ҷойи сеюм Афғонистонро шикаст доданд. Малдив ҷойи дуюмро гирифт.

Бо натиҷагирӣ аз мусобиқа, Гурдофарид Ақназарова, аз тими Тоҷикистон, беҳтарин муҳофизатгари хатти миёна эътироф шуд.

15-уми сентябр дар шаҳри Мале, пойтахти Малдив, мусобиқаи дигар – Чемпионати CAVA миёни клубҳои занона оғоз гардид, ки то 21-уми сентябр идома меёбад. Дар ин мусобиқа клубҳои – “Air Force” (Шри-Ланка), “Wamco” (Малдив), “Nepal Police Club” (Непал), “Humo” (Ӯзбекистон), “Maldives Police Club” (Малдив) ва “Diamed” (Тоҷикистон) ширкат доранд.

ФУТБОЛ

Душанбе – мизбони марҳалаи интихобии Ҷоми Осиё-2025 байни ҷавонон

21-29-уми сентябр дар шаҳри Душанбе марҳалаи интихобии Ҷоми Осиё-2025 байни ҷавонони то 20-сола дар гурӯҳи “Е” баргузор мешавад.

Ҳарифони тими ҷавонони Тоҷикистон дастаҳои Уммон, Малайзия, Шри-Ланка ва ҶХД Корея мебошанд. Ҳамаи бозиҳо дар Варзишгоҳи марказии ҷумҳуриявии шаҳри Душанбе сурат мегиранд.

Дар марҳалаи интихобӣ ҳамаи 45 дастаи қора дар 10 гурӯҳ ширкат мекунад ва бар асоси натоиҷи бозиҳо ғолибони 10 гурӯҳ ва панҷ дастаи беҳтарини ҷойи дуюми гурӯҳҳо ба марҳалаи финалии Ҷоми Осиё-2025, ки аз 6 то 23-юми феврал дар Чин баргузор мешавад, роҳхат мегиранд.

ФУТЗАЛ

Тими Тоҷикистон бозии аввалро дар Чемпионати ҷаҳон доир кард

Мунтахаби футзали кишвар дар бозии якум дар марҳалаи гурӯҳии Чемпионати ҷаҳон дар гурӯҳи “Е” аз тими Марокаш бо ҳисоби 2:4 мағлуб гашт. Голҳоро дар ҳайати тими миллии кишвари мо Самандар Ризомов ва Файзалӣ Сардоров заданд.

Дар бозии дигари гурӯҳ чемпиони феълии ҷаҳон – тими миллии Португалия дастаи Панамаро бо ҳисоби 10:1 шикаст дод.

Чемпионати 10-уми ҷаҳон оид ба футзал 14-уми сентябр дар Ҷумҳурии Ӯзбекистон оғоз гардид, ки дастаи Тоҷикистон бори аввал дар он ширкат дорад. Умуман, барои ба даст овардани унвони чемпиони ҷаҳон 24 даста талош мекунад. Дар баробари тими футзали мо, дастаҳои Афғонистон, Зеландияи Нав ва Фаронса аввалин иштирокдори Чемпионати ҷаҳон мебошанд.

Бразилия ва Испания дар ин мусобиқа мутаносибан панҷ ва ду маротиба ғолиб омадаанд. Пасон Аргентина ва Португалия унвони чемпиони ҷаҳонро гирифтаанд. Ин навбат низ онҳо довталабони асосӣ ба ҳисоб мераванд.

Умаралӣ САФАРАЛӢ, “Ҷумҳурият”

Санаи нашр: 17.09.2024 №: 179

Муҳокима кунед