logo

суханрониҳо

Суханронии Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон дар маросими ба истифода супурдани Маркази барқу гармидиҳии «Душанбе – 2», шаҳри Душанбе, 8 декабри соли 2016

Ҳозирини муҳтарам!
Меҳмонони арҷманд!
Дар замони муосир рушди муътадили ҳамаи соҳаҳои иқтисодиёт дар навбати аввал аз истифодаи сарватҳои табиӣ, аз ҷумла захираҳои гидроэнергетикӣ вобастагии бевосита дорад. Аз ин лиҳоз, Ҳукумати Тоҷикистон бо мақсади ҳаллу фасли масъалаҳои вобаста ба рушди ин соҳаи стратегӣ, яъне энергетика, хусусан солҳои охир бунёд намудани инфрасохтори онро вусъат бахшида истодааст. 
Мо таъмин намудани талаботи рӯзафзуни корхонаҳои истеҳсолӣ ва аҳолиро бо неруи барқ ва гармӣ тавассути барқарор намудани инфрасохтори мавҷуда, ба кор андохтани иқтидорҳои нав, истифодаи сарфакоронаи неруи барқ, паст кардани талафоти он ва бунёди марказҳои нави барқу гармидиҳӣ аз ҷумлаи вазифаҳои аввалиндараҷаи худ ва дар айни замон роҳи асосии расидан ба истиқлолияти энергетикии кишварамон мешуморем.
Маҳз бо ҳамин мақсад имрӯз боз як иншооти муҳими энергетикии кишвар – навбати дуюми Маркази барқу гармидиҳии “Душанбе - 2” - ро бо иқтидори 300 мегаватт неруи барқ ва 167 гигакалория гармӣ ба истифода супурдем.
Ба ин муносибат кормандони соҳаи энергетика ва шумо - ҳозирини гиромиро табрик гуфта, ба ҳамаи мутахассисону сохтмончиёне, ки дар бунёди маркази барқу гармидиҳӣ саҳми шоиста гузоштаанд, миннатдории самимона баён менамоям.
Бунёди навбати дуюми Маркази барқу гармидиҳии “Душанбе - 2” - ро лоиҳаи комплексӣ ё маҷмааи истеҳсолӣ гуфтан ҷоиз аст, зеро дар доираи он дар баробари насби лӯлаҳои гармигузар ба масофаи зиёда аз 20 километр ва бунгоҳи гармитақсимкунӣ, ҳамчунин, сохтмони зеристгоҳи барқии 220/110 киловолтаи «Шаҳринав», «Хонақо», хати интиқоли барқи 110 - киловолта байни зеристгоҳҳои мазкур, сохтмони 17 километр роҳи мошингард, сохтмони 4 муассисаи таълимӣ барои 6240 нафар хонанда ва як пули мошингард дар болои дарёи Душанбе ба нақша гирифта шудааст.
    Ҳоло иқтидори Маркази барқу гармидиҳӣ бо дарназардошти навбати аввал ба 400 мегаватт, яъне то 9,6 миллион киловатт – соат неруи барқ ва 235 гигакалория гармӣ дар як шабонарӯз расонда шуд. Гармие, ки истеҳсол мешавад, барои қонеъ гардондани манзили сокинони шаҳри Душанбе, муассисаҳои иҷтимоиву таълимӣ ва дигар иншооти пойтахти мамлакат равона хоҳад гардид.
Мехоҳам махсус таъкид намоям, ки ба анҷом расидани лоиҳаи имрӯза бозгӯи сатҳи баланди шарикии созанда ва ҳамкории босуръат рушдёбандаи Тоҷикистону Чин дар соҳаи энергетикаи кишвар ба ҳисоб меравад.
Лоиҳаи навбати дуюм дар доираи шартномаи байни ширкатҳои «Барқи тоҷик» ва «ТВЕА» - и Ҷумҳурии Мардумии Чин бо маблағи умумии беш аз 2,7 миллиард сомонӣ анҷом дода шудааст.
Баробари пайваст шудани иншооти имрӯза ба шабакаи ягонаи энергетикии мамлакат иқтидори умумии марказҳои барқу гармидиҳии кишвар ба 800 мегаватт баробар мешавад, ки 50 фоиз ё 400 мегаватти он ба давраи соҳибистиқлолии кишвар рост меояд.
Инчунин, дар натиҷаи ба кор оғоз намудани навбати дуюми Маркази барқу гармидиҳии “Душанбе – 2” имкон пайдо мегардад, ки дар як шабонарӯз 7,2 миллион киловатт – соат неруи барқ истеҳсол карда шуда, дар натиҷа таъмини шабонарӯзии неруи барқ дар мамлакат нисбат ба соли гузашта 16 фоиз афзоиш меёбад. Агар солҳои охир дар фасли тирамоҳу зимистон ба аҳолӣ ва корхонаҳои саноатӣ 45 - 48 миллион киловатт - соат неруи барқ интиқол шуда бошад, пас бо оғоз гардидани фаъолияти маркази имрӯза ин нишондиҳанда 52 - 55 миллион киловатт - соатро ташкил хоҳад дод. Маркази мазкур метавонад қариб 60 фоизи талаботи шаҳри Душанберо бо неруи барқ қонеъ намояд.
Тибқи маълумоти коршиносон аз ҳисоби истифодаи гармии Маркази барқу гармидиҳии “Душанбе - 2” имкони сарфаи қариб 200 мегаватт иқтидори иловагии неруи барқ пайдо мегардад, ки ин таъминоти аҳолии кишварро бо неруи барқ боз ҳам беҳтар менамояд. Чунонки сокинони шаҳри Душанбе дар хотир доранд, чанд сол пеш масъалаи таъминот бо гармӣ ва кам кардани истифодаи неруи барқ ба яке аз масъалаҳои бисёр мушкил табдил ёфта буд. 
Бо сабаби норасоии гази табиӣ ва нокифоя будани таъминот бо оби гарм дар фасли зимистон ҳоло пойтахти кишварамон ба яке аз истифодабарандагони бузурги неруи барқ табдил ёфтааст. 
Тибқи маълумот, агар дар фасли гармо дар пойтахт дар як шабонарӯз то панҷ - панҷуним миллион киловатт – соат неруи барқ истифода шавад, дар фасли зимистон ин нишондиҳанда то ба 14 – 15 миллион киловатт - соат мерасад. 
Аз ҷониби дигар, бо дарназардошти он, ки Маркази барқу гармидиҳӣ бо истифода аз ангишт фаъолият мекунад, мо имкон пайдо менамоем, ки аз захираҳои дохилии кишвар фаровон истифода карда, ҳаҷми истеҳсоли ангиштро низ афзоиш диҳем.
Бояд гуфт, ки баробари ба фаъолият оғоз кардани корхона зиёда аз 700 нафар шаҳрвандони кишвар соҳиби ҷойи кори доимӣ мегарданд. Дар ҷараёни корҳои сохтмони иншооти мазкур зиёда аз 1600 нафар мутахассисону сохтмончиёни Тоҷикистону Чин фаъолона ширкат намуда,   мутахассисон ва сохтмончиёни иншооти энергетикии кишвар таҷрибаву малакаи касбии худро дар ин самт такмил доданд.
Дар баробари ин, барои таъмин намудани фаъолияти муназзами марказ 150 нафар мутахассисони тоҷик дар Ҷумҳурии Мардумии Чин ба таҳсилу таҷрибаомӯзӣ фаро гирифта шуданд. Дар раванди корҳои сохтмон 100 нафар мутахассисони тоҷик аз ҳамкасбони чинии худ таҷрибаи идоракунии марказро аз худ намуда, имрӯз дар дастгоҳҳои назоратии марказ мустақилона фаъолият мекунанд.
Ҳозирини гиромӣ!
Айни замон бо мақсади пайваст кардани шоҳлӯлаи гармидиҳӣ ба шабакаҳои гармигузаронии шаҳр ва дигар иншооту биноҳо корҳои васлкунӣ идома доранд.
Баробари ба истифода супурдани маркази мазкур мушкилоти гарм намудани манзилҳои зисти сокинон ва фаъолияти муназзами корхонаву муассисаҳо дар фасли тирамоҳу зимистон дар самти истифодаи неруи барқ се баробар кам гардида, дар навбати худ имконият фароҳам меорад, ки барқи аз ин ҳисоб сарфашуда ба шаҳру ноҳияҳои атрофи пойтахт интиқол дода шавад.
Дар робита ба таъмини сокинони пойтахт бо гармӣ мақомоти иҷроияи ҳокимияти давлатии шаҳри Душанбе, роҳбарони корхонаву идораҳо ва аҳолии пойтахтро бори дигар хотиррасон менамоям, ки корҳои таъмиру барқарорсозии шабакаҳои буғ ва оби гарм ва пайвастани хонаҳои истиқоматиро ҳарчи зудтар ва бо сифати баланд анҷом дода, ба масъалаи истифодаи самараноку сарфакоронаи гармии истеҳсолшаванда ва неруи барқ эътибори аввалиндараҷа диҳанд.
Боз як афзалияти дигари маркази нави барқу гармидиҳиро зикр бояд кард, ки дар он бо истифода аз дастовардҳои навтарин ва усулҳои муосири техникиву технологӣ барои безараргардонии партов ҳамаи тадбирҳои зарурӣ андешида шуда, дуди ангишт аз полоиши барқӣ (электрофилтр) гузаронда мешавад ва баъдан тавассути дастгоҳи махсус поксозӣ шуда, 99,8 фоизи он безарар гардонда мешавад. Баъдан хокистари ангиштсанг ба сифати партови истеҳсолӣ барои истеҳсоли семент истифода мегардад.
Ин ҳама нишонаи он мебошад, ки Маркази барқу гармидиҳии “Душанбе - 2” ҳамчун лоиҳаи муваффақи энергетикӣ манфиатбахш будани худро собит месозад ва ба кор оғоз намудани он, бешубҳа, боз як қадами устувор ба сӯи истиқлолияти энергетикӣ, яъне амалӣ гардидани ҳадафи стратегии кишварамон мебошад. Вале бояд гуфт, ки ҳарчи бештар ва самаранок истифода бурдани захираву имкониятҳои мамлакат аз заҳмати софдилонаи ҳар як фарди ҷомеа ва муносибати ғамхоронаву сарфакоронаи тамоми шаҳрвандон вобаста мебошад. Зеро дар баробари афзоиши истеҳсоли неруи барқ шумораи корхонаҳои саноатӣ ва аҳолӣ низ зиёд гардида, талабот ба неруи барқ торафт афзуда истодааст.
Аз ин хотир, зарур аст, ки дар баробари дигар чорабиниҳо барои нигоҳ доштани тавозун байни истеъмолу истеҳсол, воридот ва истифодаи технологияҳои каммасрафи барқӣ ва сарфаи неруи барқ дар тамоми бахшҳои иқтисодиёти кишвар ҳамаи чораҳо амалӣ карда шаванд.
Мехоҳам бо қаноатмандӣ зикр намоям, ки иншооти имрӯза боз як нишонаи заҳмати софдилонаи энергетикҳои мамлакат дар соли ҷашни муқаддаси биступанҷсолагии Истиқлолияти давлатӣ ва туҳфаи арзанда ба сокинони пойтахти давлати соҳибистиқлоламон мебошад.
Бори дигар ҳамаи сокинони пойтахтро ба муносибати оғози фаъолияти Маркази барқу гармидиҳии “Душанбе – 2” табрик гуфта, ба бунёдкорону мутахассисон ва ҳамаи онҳое, ки дар сохтмони иншооти муҳим саҳми ватандӯстона гузоштаанд ва фаъолияти минбаъдаи онро таъмин мекунанд, саломатӣ ва барори кор орзу менамоям.
Ҳамеша сарбаланду муваффақ бошед!


Баёни ақида (0)    Санаи нашр: 8.12.2016    №: 241    Мутолиа карданд: 6514

19.10.2017


Баррасии тадбирҳои дастгирии рушди соҳибкории ҷавонон

РАШТ. ЯК ВОХӮРИИ МУҲИМ

ҚОЧОҚ - ЗИЁНИ ҶИДДӢ БА БУҶЕТ ВА ИҚТИСОДИЁТ

Ҷаҳон дар як сатр

Боздиди нозирони Олмон аз пойгоҳи низомии Русия дар Тоҷикистон

Силсилаи амалиёти террористӣ дар Афғонистон боиси марги беш аз 70 нафар шуд

Истеҳсолотро зеҳни сунъӣ ба даст мегирад

Ҳизби коммунисти Чин ислоҳоти густурдаи сиёсиро омода месозад

Ҷорҷ Сорос ба рушди ҷомеаи шаҳрвандӣ 18 миллиард доллар медиҳад

Ба миқдори рекордӣ расидани муҳоҷирон дар ИМА

Варзиш

16.10.2017


Ҳамоиши навбатии Шӯрои тиҷоратии ИМА-Тоҷикистон

Низомиддин Зоҳидӣ Абделҷалил Сабуриро ба ҳузур пазируфт

Мубодилаи таҷрибаҳо байни Тоҷикистон ва Фаронса

Ҳамкориҳо дар соҳаи маориф бо Озарбойҷон густариш меёбанд

Истиқрори дипломатӣ бо Гренада ба роҳ монда шуд

Ҷаҳон дар як сатр

Дар амали террористии Сомалӣ 276 нафар қурбон гашт

Раққа аз ҷангиёни «ДИ» озод карда шуд

Пешгирии амали террористӣ дар Афғонистон

Дар Қирғизистон президенти навро интихоб карданд

Боздошти омӯзгори террорист дар Ҷалолобод

13.10.2017


Баррасии масоили мубрами тақвияти ҳамкориҳо

Мулоқоти Рамазон Раҳимзода бо донишҷӯёни ДМТ

Густариши муносибатҳои фарҳангии Тоҷикистону Ӯзбекистон

Вохӯрӣ бо вазири иқтисоди Озарбойҷон

12.10.2017


Баррасии масоили муҳими ҳамкорӣ

Муаррифии имкониятҳои сармоягузории Фонди сабзи иқлимӣ

Аббосалӣ Гасанов: «Тоҷикистон фарҳанги бою ғании худро ба дигар миллатҳо тарғиб кунад»

Вохӯрии Рустам Солӣ бо Азад Рагимов

МАВОДИ НАШЪАОВАР. Боз 311 килограмм ба коми оташ рафт

11.10.2017


Интиқоди Азим Иброҳим аз сатҳи омодагӣ ба давраи зимистон дар вилояти Хатлон

Баргузории ҷаласаи Шӯрои вазирони корҳои хориҷии ИДМ

Масъалаҳои таъмини амнияти иттилоотию озуқаворӣ матраҳ мегарданд


Дар сомонаҳои дигари Тоҷикистон хонед