фарҳанг
ХАТЛОН. ТАҶЛИЛИ ХОТИРМОНИ МЕҲРГОН
Ҷашни Меҳргон дар маркази маъмурии вилояти Хатлон – шаҳри Қӯрғонтеппа бо иштироки васеи деҳқонон, роҳбарони корхонаю идораҳои соҳаи кишоварзӣ ва сокинон бо шукӯҳу шаҳомат таҷлил гардид.
Намоиши маҳсули дастранҷи кишоварзон – сабзавоту, меваҷот, полизӣ ва маҳсулоти чорводорӣ аз бобарор омадани сол гувоҳӣ медод.
Раиси вилояти Хатлон Гулмаҳмадзода Давлатшоҳ Қурбоналӣ баъди тамошои намоиш бо қаноатмандӣ изҳор намуд, ки рушди соҳаи кишоварзӣ метавонад мӯҷиби рушди давлат ва ҳалли яке аз ҳадафҳои стратегӣ - таъмини амнияти озуқаворӣ гардад. Ба бовари ӯ, дар ин ҷода барзгарони хатлонӣ марҳила ба марҳила ба муваффақиятҳои назаррас ноил гардида истодаанд.
Раиси вилоят бо ишора ба мақому манзалати Ҷашни бостонии Меҳргон, гуфт, ки Наврӯзи Аҷам аз зиндашавии табиат ва оғози кишту кор, Меҳргон аз фаровонии ҳосил, дастархони пур аз нозу неъмат ва осоиши моддию маънавӣ башорат медиҳанд.
Озмунҳои вилоятии “Оши палов” ва “Кадбонуи беҳтарин”, ки ба хотири ба як ҷашни пур аз шодию сурур табдил додани Меҳргон ташкил шуда буданд, бисёр ҷаззобу тамошобоб сурат гирифтанд.
“Кафгири заррин” – аввалҷоизаи озмуни “Оши палов” ба ошпази моҳир аз ноҳияи Ёвон Олим Мадаминов тақдим гардид. Ҳунари ошпазон Нишон Тӯхтамишев (аз ноҳияи Вахш) ба ҷойи якум, Абдураҳмон Файзуллоев (аз ноҳияи Данғара) бо ҷойи дуюм ва Мирзо Асламов (аз ноҳияи Фархор) ба ҷойи сеюм сазовор дониста шуд.
Зимни озмуни “Кадбонуи беҳтарин” ғизою хӯришҳои болаззат ва тамошобоб омодакарда ва дастархонҳои бонизоми бонувон Ҷамила Бобоева (аз шаҳри Қӯрғонтеппа), Моҳитобон Хоҷаева (аз ноҳияи Қубодиён) ва Азизхоним Самиева (аз ноҳияи Ҷалолиддини Балхӣ) сазовори се ҷойи аввал (мутаносибан) гардиданд. Мукофотҳои омодакардаи кумитаи тадорукотро раиси вилоят ба ғолибон супурд.
Ҳамчунин, деҳқонон ва масъулони раёсатҳои кишоварзии шаҳру навоҳии вилоят, ки дар коштану ғундоштани ҳосили зироатҳои кишоварзӣ имсол фаъол буданд, аз ҷониби раиси вилоят бо туҳфаҳои хотиравӣ ва “Сипоснома”-и мақомоти иҷроияи ҳокимияти давлатии вилояти Хатлон қадр карда шуданд.
Зокир ҲАСАН, “Ҷумҳурият”
Баёни ақида (0) Санаи нашр: 23.10.2017 №: 219 Мутолиа карданд: 1235
