logo

сиёсат

МАГӮ СУБҲИ ТАРАБ ДАР МУЛКИ ҲАСТӢ ДЕР МЕОЯД...

(Таассурот аз чорабиниҳои тантанавӣ ба ифтихори 25 - умин солгарди Иҷлосияи XVI Шӯрои Олии Ҷумҳурии Тоҷикистон)
Вақт ҳамчун довари бузургу беназир ба раванди марҳилаҳои гуногуни ҷомеасозӣ дар ҳама давру замон баҳои холисона дода, собит намудааст, ки  маҳз шахсиятҳои бузург қодиранд инсонҳоро дар ҳалли масъалаҳои печидаву мураккаби сиёсиву иқтисодӣ, иҷтимоиву фарҳангӣ раҳнамоӣ карда, дар қалбу дидаи мардум умед ба зиндагии шоиста ва ояндаи дурахшонро барафрӯзанд. Андеша ва садоқати азалии муҳтарам Эмомалӣ Раҳмон, фарзона - фарзанди миллати тоҷик, абармарди олами сиёсии ҷаҳон, замина гаштанд, ки дар ҳассоcтарин лаҳзаҳои душвори таърихӣ ин миллату давлатро аз парокандагӣ наҷот диҳанд.

Ҳамчун иштирокчии маҷлиси тантанавӣ ба ифтихори 25 - умин солгарди Иҷлосияи 16-уми Шӯрои Олии Ҷумҳурии Тоҷикистон, ки 19-уми ноябри соли равон бо иштироки   Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар Қасри Арбоб  доир гардид, бо бардошти як ҷаҳон таассуроту рӯҳияи идона хостам чанде аз андешаҳои худро оид ба натиҷаҳои ин рӯйдоди таърихии миллӣ баён намоям.  Бо таваҷҷуҳ ба аҳамияти таърихии Иҷлосияи тақдирсоз, нахуст Пешвои миллат муҳтарам Эмомалӣ Раҳмон ҳамаи иштирокчиён ва кулли мардуми кишварро бо солгарди Иҷлосияи тақдирсозу таърихӣ, ки оғози марҳилаи созандагӣ ба хотири ваҳдати комили сартосарӣ ва сулҳу субот буд, табрику таҳният гуфтанд.
Зикр гардид, ки Иҷлосияи таърихии шонздаҳуми Шӯрои Олӣ бо дарназардошти ҳадафҳои олии давлати соҳибистиқлоламон дар давраи басо душвори сиёсиву низомӣ бо мақсади таъмини ҳар чи зудтари сулҳу оромӣ, ваҳдату ҳамдигарфаҳмӣ, ҳифзи якпорчагии давлати мустақили тоҷикон ва муҳайё намудани шароит барои барқарор намудани сохторҳои фалаҷгаштаи Ҳукумат, ки бар асари ҷанги шаҳрвандӣ хароб гаштанд, даъват шуда буд.
Пешвои миллат дар мавриди набзи ноустувори он замон ишора намуда, афзуданд, ки мафкураи халқ  амалан ду тақсим шуда буд ва ҷавонони бетаҷрибаву гирифтори эҳсосот бо дастури хоҷагони дохиливу хориҷии хеш ба майдонҳо баромада, вазъиятро боз ҳам мураккабтар месохтанд. Аз ҷумла, роҳбарони собиқ Ҳизби террористиву экстремистии наҳзат ва хоҷагону маблағгузорони онҳо, ки ташаббускори ин ҷанги бародаркуш буданд, барои ноил шудан ба ҳадафҳои нопоки худ, яъне ба сари мардуми мо таҳмил додани мазҳаби бегона ва бунёди давлати исломӣ ба оташ равған мерехтанд. Пешвои миллати тоҷикон муҳтарам Эмомалӣ Раҳмон аз вазъи мураккаби сиёсӣ, инчунин аз ду роҳи ба миён омада: яке марг ва дигаре масъулияти роҳбариву соҳибии давлату миллат ёд оварда,  зикр карданд, ки интихобу иродаи устувори мардум моро ба сулҳ ва ваҳдат расонданд.
Нуктаи арзишманде, ки беихтиёр мавҷи кафкӯбиҳои аҳли толорро афзун намуд, ин ёдовар шудани Пешвои миллат аз қабули муроҷиатнома ба мардуми шарифи Тоҷикистон аз 12 – уми декабри соли 1992 буд: «Тамоми донишу таҷрибаамро барои дар ҳар хона ва ҳар оила барқарор шудани сулҳ равона карда, барои ободиву пешрафти Ватани азизам садоқатмандона меҳнат мекунам. Барои ноил шудан ба ин нияти муқаддас, агар лозим шавад, ҷони худро нисор мекунам, чунки ман ба ояндаи неки Ватанам ва ҳаёти хушбахтонаи халқи азияткашидаам бовар дорам…»
Президенти Ҷумҳурии Тоҷикистон роҷеъ ба қабули нахустин қонунҳои замон ёдовар шуда, илова намуданд, ки иҷлосия кори худро маҳз аз қабули қонунҳои Ҷумҳурии Тоҷикистон «Дар бораи афви умумӣ» ва «Дар бораи гурезаҳо» шурӯъ кард.
Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба аҳамияти таърихии Иҷлосияи сарнавиштсоз таваҷҷуҳи бештар зоҳир карда, афзуданд, ки мо бояд арзиши сулҳу ваҳдати миллиро ҳамчун фарҳанги зиндагии мардум боз ҳам густариш диҳем ва дар замири насли ҷавон ҳисси баланди миллӣ, эҳсоси худшиносиву ватандӯстӣ, ахлоқи ҳамида, сабру таҳаммул, омӯзиши илму дониш ва касбу ҳунарҳои муосир, ҷиддияту заҳматдӯстӣ ва эҳтироми волоияти қонунро тарбия кунем, то онҳо тавонанд Ватани азизамонро ҳамчун намояндагони сазовор ва арзандаи миллати куҳанбунёди тоҷик дар арсаи ҷаҳон ба таври шоиста муаррифӣ намоянд.
Дар анҷоми ин ҷамъомади тантанавӣ вакилони Иҷлосияи таърихии 16 - уми Шӯрои Олии Ҷумҳурии Тоҷикистон назару афкори худро оид ба хидматҳои арзишманд ва натиҷаи иҷрои он ваъдаҳои Пешвои миллат, ки ин сиёсатмадори ҷавони тоҷик ҳанӯз дар рӯзҳои аввали роҳбарии худ дода буданд, ёдовар шуданд.
Воқеан ҳам, музаффариятҳои Тоҷикистони азиз то ба имрӯз бо номи Пешвои муаззами миллат муҳтарам Эмомалӣ Раҳмон алоқамандии ногусастанӣ доранд, зеро иҷрои муваффақонаи марҳилаҳои замони тайкардаи соҳибистиқлолии кишвар аз дурнамои устувори рушди иқтисоди миллӣ ва фароҳамсозии субҳи тарабафзои ин мулки аҷдодӣ мужда мерасонд.
Он ҳама ҳидояту тавсияҳои судманде, ки Пешвои миллат зимни маҷлиси тантанавӣ иброз доштанд, барои мо - кормандон ва ҳизбиёни шаҳри Душанбе ҳамчун дастури амал маҳсуб меёбанд. Маҳз ин дастуру тавсияҳои созанда моро ба сӯи фатҳи қуллаҳои нави созандагиву бунёдкориҳо дар ҷараёни давлатсозии миллӣ дилгарм намуда, муваззаф мегардонанд, ки фаъолияти ҳамарӯзаи худро баҳри таҳкими истиқлолияти давлатӣ, пойдор нигоҳ доштани ваҳдати миллӣ, муборизаи беамон бурдан алайҳи ҳама гуна зуҳуроти номатлуб, амсоли терроризму экстремизм, гаравиши ҷавонон ба ҳизбу ҳаракатҳои мамнӯъ, хурофотпарастию таассуби динӣ ва фарҳанги бегона тақвият бахшем.
Зоир РАҲМОНЗОДА,
раиси Кумитаи иҷроияи ҲХДТ дар шаҳри Душанбе


Баёни ақида (0)    Санаи нашр: 23.11.2017    №: 240-241    Мутолиа карданд: 1432
12.04.2021


КИТОБИ «ТОҶИКОН» ДАСТРАСИ СОКИНОНИ НОҲИЯИ САНГВОР ГАРДИД

НУРОБОД ДАР СӢ СОЛИ ИСТИҚЛОЛИЯТ

СУҒД. ФЕСТИВАЛИ ВИЛОЯТИИ «ҲУНАР БЕҲТАР АЗ ЗАР БУВАД» БАРГУЗОР МЕГАРДАД

СУҒД. 420 000 СОМОНӢ ГРАНТ БАРОИ ЗАНОНИ ҲУНАРМАНДУ ЭҶОДКОР

МЕРОСИ ТАЪРИХИЮ ФАРҲАНГӢ. ҲАМОИШИ МУҲИМИ КОРШИНОСОН

«КАДБОНУИ БЕҲТАРИН» МУАРРИФИИ ҒОЛИБОНИ ОЗМУН

ЛИГАИ ОЛӢ

09.04.2021


ТОҶИКИСТОН ВА АМА. ГУСТАРИШУ ТАҲКИМИ ҲАМКОРИҲО ТАЪКИД ШУД

ОЛМОН БО РОССИЯ ОИД БА ДАРЁФТИ «СПУТНИК V» МУЗОКИРОТ МЕГУЗАРОНАД

ҶАҲОН ДАР ЯК САТР

08.04.2021


ТОҶИКИСТОН – МАҶОРИСТОН. САҲИФАИ НАВИ ҲАМКОРӢ БОЗ ШУД

САРВАРИ ВКХ ПОКИСТОН РОССИЯРО ОМИЛИ УСТУВОРӢ ДАР МИНТАҚА ВА ҶАҲОН НОМИД

ҶАҲОН ДАР ЯК САТР

ТАСВИРИ ОБ ДАР АСАРҲОИ РАССОМОНИ ТОҶИКИСТОНӢ

«ХУҶАСТА БОД ИСТИҚЛОЛ!»

Мулоқоти Сироҷиддин Муҳриддин бо Армида Салсия Алишаҳбана

МАГНОЛИЯ. НИҲОЛИ НОДИР ДАР ХУҶАНДИ БОСТОН

07.04.2021


МИСГАРӢ — БОЗГӮИ РАМЗҲО ВА АНЪАНАҲОИ МАРДУМӢ

«ТЕРРОРИЗМ РЕЛИГИОЗНЫХ ЭКСТРЕМИСТОВ...»

Лавров: «СММ низоъҳоро дар дунё муваффақона ба низом меоварад»

ҶАҲОН ДАР ЯК САТР

ФУТБОЛ

06.04.2021


ВМКБ. НАҚШАИ ДАЪВАТ ДАР ЯК РӮЗ ИҶРО ШУД

ИШКОШИМ. ҒОЛИБОН БА НОҲИЯ БАРГАШТАНД

Лавров барқарорсозии кори «формати Москва»-ро зарур шумурд

ҶАҲОН ДАР ЯК САТР

ЛИГАИ ОЛӢ

ТАШКИЛИ ЯРМАРКА - ФУРӮШИ МАҲСУЛОТИ КИШОВАРЗӢ ДАР ХУҶАНД

МИНТАҚАИ РАШТ. ИҶРОИ НАҚШАИ ДАЪВАТ ДАР ЯК РӮЗ

УНВОНУ ДАРАҶАҲОИ ИЛМИИ РОССИЯВУ ТОҶИКИСТОН БАРОБАРАРЗИШ МЕШАВАНД

02.04.2021


ХИЗМАТИ ҲАРБӢ. ВМКБ ВА 5 НОҲИЯИ ХАТЛОН НАҚШАРО ИҶРО КАРДАНД

МУЛОҚОТИ РУСТАМИ ЭМОМАЛӢ БО ПАК БЁН СОК

ҶОНИБДОРИИ ВАНХЁРК АЗ МУКОЛАМАИ ВАШИНГТОН БО МОСКВА

ҶАҲОН ДАР ЯК САТР

01.04.2021


ЛИГАИ ОЛӢ. Бори аввал легионерҳои нидерландӣ ва ҷопонӣ ҳунарнамоӣ мекунанд


Дар сомонаҳои дигари Тоҷикистон хонед