logo

суханрониҳо

Суханронии Эмомалӣ Раҳмон, Президенти Ҷумҳурии Тоҷикистон, дар маросими ифтитоҳи муассисаи таълимии таҳсилоти умумии ғайридавлатии «Академияи умумиҷаҳонии Кембриҷ» дар шаҳри Душанбе, 20 сентябри соли 2018

Устодону хонандагони азиз!
Меҳмонони арҷманд!
Чунонки сокинони пойтахт дар хотир доранд, моҳи апрели соли 2017 мо дар шаҳри Душанбе санги асоси Муассисаи таълимии таҳсилоти умумии ғайридавлатии «Академияи умумиҷаҳонии Кембриҷ» - ро гузошта будем.
Инак, баъди якуним сол бунёди муассисаи таълимӣ ба анҷом расид ва имрӯз ба фаъолият оғоз кард.
Ба ин муносибат кулли устодону шогирдони ин муассисаи навбунёд ва аҳли маорифи шаҳри Душанберо табрик мегӯям ва ҳамзамон бо ин, ба ҳамаи онҳое, ки дар бунёди ин боргоҳи донишу маърифат саҳм гузоштаанд, аз ҷумла ба ҷамъиятҳои «Меъмориву шаҳрсозӣ» ва маркази таълимии «Ганҷина», миннатдорӣ баён менамоям.
Бояд гуфт, ки дар даврони соҳибистиқлолӣ ва хусусан баъди солҳои 2000-ум, дар асоси ҳамкориҳои судманд бо як қатор кишварҳои дӯст, шарикони рушд ва созмонҳои бонуфузи байналмилалӣ дар мамлакатамон доир ба беҳсозии шароити таълиму тарбия ва омода кардани мутахассисони ҷавобгӯ ба бозори меҳнат даҳҳо муассисаи таҳсилоти умумии миёна бунёд ва мавриди баҳрабардорӣ қарор гирифта, дар шаҳри Душанбе филиали чандин муассисаҳои таҳсилоти олии давлатҳои пешрафта таъсис дода шуданд.
Дар ин раванд чанд рӯз пеш дар шаҳри Хоруғи Вилояти Мухтори Кӯҳистони Бадахшон Донишгоҳи Осиёи Марказӣ ба фаъолият оғоз кард, ки он минбаъд барои тайёр кардани мутахассисони баландихтисоси сатҳи ҷаҳонӣ аз ҳисоби ҷавонону наврасони болаёқати Тоҷикистон ва дигар кишварҳои минтақа саҳми арзанда хоҳад гузошт. Яъне давлат ва Ҳукумати Тоҷикистон дар ин самт аз ҳамаи имкониятҳо истифода карда истодаанд, то ки барои фарзандони мо тамоми шароити зарурии таълиму тарбия фароҳам оварда шавад ва насли ояндасози ватанамон соҳиби дониш ва касбу ҳунари замонавӣ гарданд.
Донишгоҳҳои Оксфорд ва Кембриҷи Британияи Кабир аз ҷумлаи муассисаҳои таълимии хеле шуҳратманду бонуфузи олам ба ҳисоб мераванд ва таҳсил дар чунин муассисаҳои сатҳи ҷаҳонӣ орзуи ҳар як наврасу ҷавон мебошад. Аммо, барои дохил шудан ба ин гуна донишгоҳҳо омодагии амиқу ҳамаҷонибаи довталабон зарур аст ва на ҳамаи хоҳишмандон метавонанд ҷавобгӯи талаботи онҳо бошанд.
Бинобар ин, мо тасмим гирифтем, ки намояндагии донишгоҳҳои зикршударо дар кишварамон таъсис дода, дар заминаи онҳо ҷавонони худро барои шомил шудан ба зинаи таҳсилоти олии донишгоҳҳои зикршуда омода созем.
Муассисаи навбунёди имрӯза, яъне Академияи умумиҷаҳонии Кембриҷ аз се бинои ду ва сеошёна иборат буда, бо дарназардошти санъати баланди меъморӣ бунёд гардидааст.
Дар бинои якуми муассиса ошхона, нуқтаи тиббӣ, китобхонаву синфхонаҳо барои таълиму тарбияи томактабӣ ва барои хонандагони синну соли аз 7 то 11 - сола ҷойгир шудаанд.
Китобхонаи муассиса дорои китобхонаи электронӣ буда, он ба шабакаи китобхонаҳои машҳури Аврупо пайваст мебошад ва дар он барои омӯзгорону хонандагон имконияти дастрасӣ ба адабиёту иттилооти зарурии таълимӣ фароҳам оварда шудааст. Инчунин, дар китобхона маводи таълимӣ ва адабиёти гуногун аз осори шоирону нависандагони машҳури Аврупо мавҷуд буда, барои баргузор намудани машғулиятҳои амалӣ ҳамаи шароиту имкониятҳо муҳайё карда шудаанд.
Дар бинои дуюми муассиса синфхонаҳои алоҳида барои таълими меҳнат, аз ҷумла азхудкунии ҳунари кадбонугӣ, омӯзиши технологияҳои муосир, толори варзиш, ҳавзи оббозӣ, синфхонаву ҳуҷраҳои фаннӣ барои хонандагони синни 12-13 ва 14-18 - сола, толори маҷлис барои 90 ҷойи нишаст, ҷойгир карда шудаанд.
Дар бинои сеюм маркази коркарди маводи иттилоотиву технологӣ ҷойгир гардида, минбаъд дар он имконияти қабули имтиҳонҳои дохилшавӣ ба муассисаҳои таҳсилоти олии кишварҳои Аврупо фароҳам оварда мешавад.
Раванди таълим дар муассиса тибқи меъёрҳои давлатии таҳсилоти Британияи Кабир, стандартҳои давлатии таҳсилоти Ҷумҳурии Тоҷикистон ва бо забони англисӣ сурат мегирад.
Таълиму тарбияи томактабӣ дар маркази инкишофи кӯдакон ва давраи таҳсилоти умумӣ дар се зина: ибтидоӣ, умумии асосӣ ва миёнаи умумӣ амалӣ карда мешавад ва минбаъд таҳсил дар зинаи таҳсилоти миёнаи умумӣ ҷиҳати омода намудани хонандагон барои идомаи таҳсил дар муассисаҳои таҳсилоти олии касбӣ оғоз хоҳад гашт. Дар маркази инкишофи кӯдак тарбиягирандагон аз синни сесолагӣ барои таҳсил омода карда мешаванд.
Дар маҷмӯъ, дар муассиса барои 640 нафар шогирдон шароити таълиму тарбияи томактабӣ ва таҳсилоти умумӣ фароҳам оварда шуда, хонандагон бо сарулибоси ягонаи мактабии тарзи аврупоӣ таъмин мегарданд.
Бояд гуфт, ки омӯзгорону хонандагони муассиса бо маводи зарурии таълимӣ, воситаҳои аёнӣ, китобҳои дарсӣ, адабиёти бадеӣ ва дигар таҷҳизоти таълим, ки дар Аврупо таҳияву истеҳсол шудаанд, таъмин карда мешаванд. Ҳамчунин, қобили зикр аст, ки ҷараёни таълим дар муассиса бо истифодаи пешрафтатарин технологияҳои иттилоотӣ сурат гирифта, раванди азхудкунии фанҳои таълимӣ, иҷрои машғулиятҳои синфӣ ва хонагии шогирдон тавассути таҷҳизоти электронии муосир таҳти назорати доимӣ қарор дода мешавад.
Пас аз хатм ба шогирдони мактаб ҳуҷҷатҳои таҳсилоти намунаи давлатии Ҷумҳурии Тоҷикистон ва Британияи Кабир дода мешаванд ва онҳо метавонанд минбаъд таҳсилро дар муассисаҳои таҳсилоти олии касбӣ ва илмии кишварҳои Аврупо, Амрико, Ҷопон ва мамолики дигар идома диҳанд.
Ҳайати омӯзгорону устодон аз ҳисоби беҳтарин мутахассисони Британияи Кабир ва Ҷумҳурии Тоҷикистон даъват гардида, машғулияту дарсҳо бо истифода аз усулҳои пешрафтаи таълим ба роҳ монда мешаванд. Омӯзгоронро дар ҷараёни таълиму тарбия ассистентҳои соҳибкасби риштаҳои педагогика ва психология кумаку роҳнамоӣ мекунанд.
Муассиса ҳамкории мутақобилан судмандро бо яке аз ширкатҳои маъруфи Британияи Кабир - "Академияи умумиҷаҳонии Кембриҷ" ба роҳ мондааст, ки он бо 370 муассисаи таълимии 25 давлати хориҷӣ, аз ҷумла Аврупо, Амрико, Осиё, Шарқи Наздик ва Африқо, ҳамкорӣ менамояд.
Роҳбарони муассиса нақша доранд, ки то соли 2020 барои ҷавонони синни аз 18 то 23 - сола коллеҷ бунёд намоянд, ки дар он шаҳрвандони ҳам Тоҷикистон ва ҳам кишварҳои хориҷӣ ба таҳсил фаро гирифта шуда, дар оянда онҳо метавонанд таҳсили худро ба тариқи гузариш дар коллеҷҳои кишварҳои хориҷӣ, ки бо Академияи умумиҷаҳонии Кембриҷ ҳамкорӣ доранд, идома диҳанд.
Ҳозирони гиромӣ!
Таъсис ёфтани намояндагии муассисаҳои таълимии давлатҳои пешрафтаи дунё дар кишварамон ба ҷавонони болаёқати мо, яъне насли даврони истиқлолият имконият фароҳам меорад, ки ҳарчи бештар соҳиби донишҳои мукаммал ва касбу ҳунарҳои муосир гарданд.
Наврасону ҷавонони мо дар навбати худ бояд хуб дарк намоянд, ки барои соҳиб шудан ба донишҳои муосир ва касбу ҳунарҳои замонавӣ бисёр кӯшиш намоянд, Ватани муқаддаси худ – Тоҷикистони соҳибистиқлолро самимона дӯст доранд, рафтору кирдори намунавӣ дошта бошанд ва ҳамеша дар пайи ҷустуҷӯи илму дониш саъю талош кунанд. Танҳо дар чунин сурат мо метавонем кадрҳои баландихтисос, соҳиби илму дониши замонавӣ ва ватандӯсту ояндасозро ба воя расонем ва минбаъд тақдири давлати худро ба дасти онҳо супорем.
Бо истифода аз фурсат, ба роҳбарони дигар муассисаҳои таълимии пойтахти мамлакат таъкид менамоям, ки таҷрибаи пешбурди корҳои таълиму тарбияро, ки дар ин мактаб ва умуман муассисаҳои пешрафта ба роҳ монда шудааст, омӯзанд ва дар ҷараёни фаъолияти худ усулҳои муосири таълимро ҳар чи бештар истифода баранд.
Дар охир ҳамаи шумо, ҳозирони гиромӣ ва меҳмонони арҷмандро бори дигар ба ифтихори оғози фаъолияти муассисаи нави таълимӣ табрик мегӯям ва ба ҳар яки шумо дар ҷодаи омӯзиши донишҳои замонавӣ ва таълиму тарбияи фарзандон барору комёбӣ орзумандам.
Ҳамеша саломату муваффақ бошед!


Баёни ақида (0)    Санаи нашр: 21.09.2018    №: 186    Мутолиа карданд: 384

19.07.2019


ПАЛАТАИ ҲИСОБ. 88,З миллион сомонӣ зарари молиявӣ ошкор гашт

УМЕД БОБОЗОДА: "Аксари муроҷиатҳо оид ба адолати судиянд"

Кӯдакони аз Ироқ овардашуда ба зиндагии муқаррарӣ бармегарданд

"EXPO 2019 BEIJING". Гӯшаи Тоҷикистонро беш аз як миллион нафар тамошо кард

НИГАРОНӢ. Ҷудошавии 6065 оила дар ним сол

18.07.2019


ХАДАМОТИ ЗИДДИИНҲИСОРӢ. Болоравии нархи барқ ба қарзи он марбут аст

Азим Иброҳим Ким Тэ Сонгро ба ҳузур пазируфт

Ба ташкили корхонаҳои муштарак ҳавасмандӣ зоҳир гардид

Ҳамоиши «Ваҳдат – омили ягонагӣ ва суботи ҷомеа» доир шуд

Ҳамкорӣ бо Қатар густариш меёбад

Саридораи геология. 2810 харитаи геологӣ рақамӣ шуд

121 шахси масъул ба ҷавобгарии маъмурӣ кашида шуд

Роҳи нави сесатҳаи Душанбе ба истифода дода мешавад

Президенти Қазоқистон Шӯрои миллии эътимоди ҷомеаро созмон дод

Дар Ӯзбекистон аввалин IT-технопарк бунёд мегардад

Ҷаҳон дар як сатр

17.07.2019


Музокироти ҳайатҳои расмии Тоҷикистон ва Корея

КУМИТАИ МУҲИТИ ЗИСТ. Нигаронӣ аз набудани партовгоҳҳо дар деҳот

ПРОКУРАТУРАИ ГЕНЕРАЛӢ. 5774 гектар қитъаи замин ба ҳолати аввала баргардонда шуд

ИЗЗАТУЛЛО САТТОРӢ: "Истеҳсоли гӯшти мурғ 9 маротиба зиёд мегардад"

ВАЗОРАТИ АДЛИЯ. Хулосаи ҳуқуқӣ ба 1936 лоиҳаи санадҳои меъёрии ҳуқуқӣ

ТАЭКВОН – ДО. Муниса медали тилло ба даст овард

Суръати рушди ММД Тоҷикистон миёни кишварҳои ИДМ баландтарин шуд

Тоҷикистон ба сохтмони лӯлаи гази «Осиёи Марказӣ — Чин» шурӯъ мекунад

Дар ҷанубу ғарби Чин аз хушксолӣ 7,4 миллион нафар зарар дид

Ҷаҳон дар як сатр

Нашрияи расмии Ҷумҳурии Тоҷикистон – рӯзномаи «Ҷумҳурият» якҷо бо мақомоти иҷроияи ҳокимияти давлатии вилояти Хатлон бахшида ба Ҷашни 30 - солагии Истиқлолияти давлатии Ҷумҳурии Тоҷикистон таҳти унвони «ТОҶИКИСТОН – ХОНАИ УМЕДИ МО» озмун эълон менамояд.

16.07.2019


ХАДАМОТИ АЛОҚА. Корти ID симкорти муштариро ба расмият медарорад

ЭНЕРГЕТИКА. 2,5 миллиард сомонӣ қарзи дебитории "Барқи тоҷик" муаммои ҳалталаб боқӣ мемонад

15.07.2019


Сарвазири Корея ба Тоҷикистон меояд

Баррасии масъалаҳои ҳамгироии САҲА, СҲШ ва ИА дар минтақаи Осиёи Марказӣ

Нахустин шумораи маҷаллаи «Осиё ва Аврупо» аз чоп баромад

ДТТ. Изҳори нигаронӣ аз вазъи бо кор таъмин шудани хатмкардаҳо

ТИБ. 288 номгӯи доруи ғайристандартӣ ошкор шуд


Дар сомонаҳои дигари Тоҷикистон хонед