Хабарҳо
16 – НОЯБР. ИН РӮЗРО ДАР СУДИ ОЛИИ ИҚТИСОДӢ БОТАНТАНА ҶАШН ГИРИФТАНД
Бо манзури эҳтирому эътирофи фазилати сиёсатмадориву давлатдории навини кишвар, таъмини сулҳу ваҳдат, ягонагии мардуми сарзамин ва болоравии нуфузу мақоми Тоҷикистони соҳибистиқлоли мо дар арсаи байналмилалӣ, ки ин пайомадҳо, дар маҷмӯъ, ба салоҳиятнокиву фаъолияти босамари Президенти Ҷумҳурии Тоҷикистон вобастагӣ дорад, дар қонунгузории кишварамон 16 ноябр – Рӯзи Президент пазируфта шуд. Ин рӯзи таърихӣ чун таҷассумгари орзую омоли неки мардум, кафили сулҳу оромӣ, меҳру муҳаббат, адолату шафқат, хираду пешрафт ва ваҳдату ҳамдилии ҷомеа мебошад.
Ин матлабро Мавлуда Қаландарзода, раиси Суди Олии иқтисодӣ, зимни ҳамоиши идона бахшида ба Рӯзи Президенти Ҷумҳурии Тоҷикистон баён кард. Дар чорабинӣ роҳбарият, судяҳо ва кормандони дастгоҳи Суди Олии иқтисодӣ ва суди иқтисодии шаҳри Душанбе иштирок ва дар бораи хизматҳои Президенти кишвар муҳтарам Эмомалӣ Раҳмон маърӯза карданд.
- Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон сарвари хирадмандест, ки давлатро аз вартаи фаноёбӣ наҷот дод, ба қалби мардум шуълаи умедро ба фардои нек бедор бахшиданд. Бо қадамҳои қатъӣ сулҳу осоишро таъмин карда, ҳадафҳои стратегии мамлакатро баҳри рушди Тоҷикистон муайян ва амалӣ намуда, дар арсаи байналмилалӣ ҳамчун шахси сулҳофару сулҳпарвар, ташаббускори ҳалли масъалаҳои глобалӣ, амалисозандаи нақшаҳои азим баҳри рушду нумӯъ ва ободии Ватану фароҳам овардани шароити арзанда барои сокинони кишвар шинохта шудани Президенти Тоҷикистонро на танҳо сокинони кишвар, инчунин, ҷаҳониён эътироф намудаанд, - гуфт Мавлуда Қаландарзода.
Ба таъкиди иштирокчиён дар таҷрибаи ҷаҳонӣ тибқи таърихи давлатдории кишварҳои пешрафтаи ҷаҳон, шахсиятҳои таърихиву барҷаставу номбардоре вомехӯранд, ки дар марҳалаву вазъиятҳои барои кишварашон мураккабу ҳассос ба арсаи сиёсат омада, суботу осоиштагӣ ва роҳи рушди минбаъдаи мамлакати худро муайян намуда, дар болоравии обрӯву мақоми давлаташон нақши абадӣ гузоштаанд. Президенти Ҷумҳурии Тоҷикистон муҳтарам Эмомалӣ Раҳмон аз зумраи чунин шахсиятҳои таърихӣ мебошанд, ки миёни мардуми тоҷик маҳбубияти зиёд доранд.
Лашкар ШАРИФЗОДА, «Ҷумҳурият»
Баёни ақида (0) Санаи нашр: №: Мутолиа карданд: 195
