Бар пояи маълумоти Федератсияи дзюдои Тоҷикистон, дар мусобиқаи Tashkent Grand Slam 2021 (5 – 7  март,  Тошканд, Ӯзбекистон) кишвари моро Абумуслим Қаюмзода, Баҳром Суфиев, Алиҷон Сафаралиев, Сомон Маҳмадбеков, Беҳрӯзи Хоҷазода, Акмал Муродов, Ҳақназар Назаров, Комроншоҳи Устопириён, Саидҷалол Саидов, Раҳмон Мансур, Темур Раҳимов, Шакармамад Мирмамадов ва Шоҳида Қаландарова (миёни бонувон) намояндагӣ мекунанд.

Дар мусобиқа иштироки 547 варзишгар (317 мард ва 230 зан) аз 78 кишвари ҷаҳон дар назар аст, - хабар медиҳад сомонаи Федератсияи байналмилалии дзюдо.

Ба гӯштигирон дар мусобиқаи байналмилалӣ ба ҷуз аз медал холҳои олимпӣ, инчунин, ба ғолиб 5000 доллари ИМА, барои ҷойи дуюм 3000 ва барои ду зинаи сеюм 1500-долларӣ дода мешавад. 

 

АСРИ ХХI, КӢ БИСЁР БОЗӢ КАРДААСТ?

Бино ба иттилои Федератсияи байналмилалии таърих ва омори футбол (IFFHS), Криштиану Роналду, ҳамлагари тими «Ювентус» ва мунтахаби Португалия, ягона футболбозест, ки дар асри ХХI, дар маҷмӯъ 1047 бор ба майдон баромада, беш аз 1000 бозӣ кардааст. 

Дар ин феҳрист Икер Касиляс (974 бозӣ), собиқ дарвозабони «Реал Мадрид» ва тими миллии Испания, зинаи дуюмро касб мекунад. Инчунин, 74 вохӯрии дигари Касиляс ба қарни гузашта рост меояд. 

 

 

HERO I-LEAGUE.  ТОҶИКБАЧА БЕҲТАРИН БОЗИГАРИ ДАВРИ 10-УМ

Комрон Турсунов, нимҳимоятгари тими миллии Тоҷикистон, ки дар дастаи «ТРАУ» Hero I-League  (дивизиони якуми Ҳиндустон) бозӣ мекунад, голи панҷуми худро зад, - хабар додааст ФФТ.

Дар қувваозмоии даври даҳум бошгоҳи «ТРАУ» дар меҳмонӣ тими «Индиан Эрроус»-ро бо ҳисоби 5:1 шикаст дод. Футболбози тоҷик дар вохӯрӣ як гол зад ва ду тӯби головар дод. 

Дар натиҷа, Комрон Турсунов беҳтарин бозигари қувваозмоӣ гардид. 

 

Маҳмуд БАҲРОМ, шореҳи варзиш