Нашрияи расмии Тоҷикистон

ҳуқуқ

Иттиҳоди Аврупо ба волоияти ҳуқуқ дар Осиёи Марказӣ таваҷҷӯҳи бештар мекунад

Чанде қабл дар толори меҳмонхонаи «Ҳаёт»-и пойтахт конфронси дуюми вазирони адлияи кишварҳои Осиёи Марказӣ ва Иттиҳоди Аврупо дар доираи ташаббуси пешгирифтаи Иттиҳоди Аврупо оид ба волоияти ҳуқуқ дар Осиёи Марказӣ баргузор гардид.
Дар он Бахтиёр Худоёров, вазири адлияи Ҷумҳурии Тоҷикистон, Хуан Карлос, котиби давлатии адлияи Испания, Жан-Марри Бокел, котиби давлатии адлияи Фаронса ва намояндагони дигар кишварҳои Иттиҳоди Аврупо ва Осиёи Марказӣ оид ба ислоҳоти судию ҳуқуқӣ ва такмили қонунгузорӣ табодули назар карданд.
Бо дарки зарурати таҳкими волоияти ҳуқуқ, ки шарти тағйирнопазире дар рушди низоми устувори сиёсӣ, фаъолияти мӯътадили сохтори иқтисодӣ ва ҳимояи муассири ҳуқуқи инсон аст, вазирони адлия ва намояндагони мамлакатҳои Иттиҳоди Аврупо ва Осиёи Марказӣ тасмим гирифтанд, ки минбаъд муҳокимаи фаъолияти мақсадноки ҳамкорӣ дар масоили ислоҳоти ҳуқуқӣ ва низоми судӣ, аз ҷумла такмили қонунгузории тиҷоратӣ ва риояи меъёрҳои ҳуқуқи байналмилалӣ дар қонунгузории миллии кишварҳои Осиёи Марказӣ идома ёбад.
Назар ба гуфти Бахтиёр Худоёров, дар конфронси дуюми вазирони адлияи давлатҳои Осиёи Марказӣ ва Иттиҳоди Аврупо масоили омӯхтани таҷриба ва мубодилаи афкори ҳамдигар дар соҳаи ислоҳоти соҳаи ҳуқуқ, аз ҷумла ислоҳоти соҳаи судию ҳуқуқӣ, тайёр кардан ва баланд бардоштани малакаи касбии кормандони соҳаи ҳуқуқ: судяҳо, ҳуқуқшиносон, нотариусони давлатӣ ва адвокатҳо, ҳамчунин такмили қонунгузории амалкунандаи кишварҳои Осиёи Марказӣ ҳалли худро ёфтанд. Вазири адлия қайд кард, ки такмили минбаъдаи қонунгузорӣ оид ба тиҷорат ва соҳибкорӣ ба ҷалби сармояи хориҷӣ ба Ҷумҳурии Тоҷикистон мусоидат хоҳад кард.
Гуннар Виганд, директори Комиссияи Аврупо оид ба Аврупои Шарқӣ, Қафқози Ҷанубӣ ва ҷумҳуриҳои Осиёи Марказӣ изҳор дошт, ки конфронси мазкур барои рушди ҳамкориҳои вазирони адлия ва сохторҳои махсуси кишварҳои Осиёи Марказӣ ва Иттиҳоди Аврупо дар масоили идомаи татбиқи ислоҳоти ҳуқуқӣ такони ҷиддӣ хоҳад дод.
Волфганг Шмитт, директори департаменти Вазорати адлияи Ҷумҳурии Федеролии Олмон, зимни суханронӣ гуфт, ки ҳанӯз се сол қабл Иттиҳоди Аврупо таҳти раёсати Олмон стратегияи волоияти ҳуқуқ дар кишварҳои Осиёи Марказиро қабул кард, ки мақсади он дастгирӣ дар самти риояи ҳуқуқи инсон, рушди давлати ҳуқуқбунёд ва демократӣ мебошад. Мавсуф бар он ақида аст, ки ҳар як мамлакат ба таври ба худ хос тараққӣ меёбад ва анъанаҳои хешро дорад. Ҳамкорӣ метавонад ба рушди мамлакатҳо ёрӣ расонад ва онро тавсеа бахшад.
-Ман мехостам, ки ҳамкориҳо дар минтақаи Осиёи Марказӣ дар роҳи демократӣ ва давлати ҳуқуқӣ боз ҳам таҳким ёбанд,- иброз дошт ӯ.
Зикр гардид, ки конфронси минбаъда соли 2012 дар яке аз давлатҳои Иттиҳоди Аврупо баргузор мегардад ва натиҷаҳо дар он ҷамъбаст хоҳанд шуд.

М. САФАР,
«Ҷумҳурият»

Баёни ақида (0)

Дар сомонаҳои дигари Тоҷикистон хонед