иҷтимоиёт
ХАТЛОН. ИНШООТИ ҶАШНӢ ВИЛОЯТРО ЗИНАТ МЕБАХШАНД
Давоми се соли омодагиҳо ба Ҷашни фархундаи 30 - солагии Истиқлолияти давлатӣ дар ноҳияи Ҷалолиддини Балхӣ мувофиқи нақша 200 иншооти таъйиноти гуногун сохта мешавад. Тавре аз мақомоти иҷроияи ҳокимияти давлатии ноҳия хабар доданд, аллакай 53 адади он ба истифода дода шудааст, ки 26,5 дарсади нақшаро дарбар мегирад.
Аз ҷумла, дар деҳоти Узун маҷмааи чойхона, мағоза ва толори ҳусн аз тарафи соҳибкор Ҳ. Қаюмов мавриди истифода қарор гирифт. Инчунин, дар ҳудуди мактаби № 30 бинои иловагӣ иборат аз 4 синфхона, ҳуҷраи омӯзгорон ва толори варзиш ба истифода дода шуд.
Дар деҳаи Фрунзеи деҳоти Фрунзе ба маблағи 65 ҳазор сомонӣ ва тариқи ҳашар 300 метр роҳи автомобилгард аз тарафи аҳолӣ мумфарш гардид. Дар ҳамин деҳот, ҳамчунин, бо ибтикори мардум чойхонаи замонавӣ сохта шуд. Дар шаҳраки Гулистон бинои нави маркази хизматрасонии Бонки давлатии амонатгузории «Амонатбонк», маркази савдою хизматрасонӣ, мағозаи фурӯши масолеҳи сохтмонӣ бунёд ва ба истифода дода шуд, ки дар иншооти номбурда сокинон соҳиби ҷойи кори доимӣ шуданд.
Дар дурдасттарин деҳаи ноҳия - Баҳор бо иштироки раиси вилоят Қурбон Ҳакимзода маҷмааи истеҳсолию хизматрасонӣ дари худро ба рӯи мардум боз намуд, ки он аз коргоҳи дӯзандагӣ, бунгоҳи тиббӣ, сартарошхона, мағоза ва ҳаммом иборат аст.
Сохтмони маҷмааи истеҳсолию хизматрасонии «Маъсума» аз ҷониби соҳибкори маҳаллӣ Маҳмадшариф Асадуллозода низ бо харҷи як миллиону 300 ҳазор сомонӣ ба анҷом расидааст. Сокинони деҳа аз ифтитоҳи чунин маҷмааи савдою хизматрасонӣ, ки дар он 20 сокини маҳаллӣ бо ҷойи кори доимӣ таъмин шуд, изҳори шодмонӣ карданд.
Дар деҳаи Суюнободи деҳоти Фрунзе маркази нави саломатӣ ба фаъолият оғоз намуд. Сохтмони маркази саломатии мазкур соли гузашта оғоз ёфта, аз ҷониби гурӯҳи ҳамоҳангсози назди Вазорати тандурустӣ ва ҳифзи иҷтимоии аҳолӣ, Лоиҳаи беҳтаркунонии хизматрасонии тиббӣ бо сарфи як миллиону 350 ҳазор сомонӣ амалӣ гардид.
- Сокинони меҳнатқарину фаъолманди хатлонзамин дастуру ҳидоятҳои Сарвари давлат муҳтарам Эмомалӣ Раҳмонро ҷиҳати вусъат бахшидани корҳои ободонию созандагӣ ба истиқболи сазовори 30 - солагии Истиқлолияти давлатӣ сармашқи кор қарор дода, бо рӯҳияи баланди меҳанпарастӣ барои саҳм гузоштан дар бунёди мактабу кӯдакистон, майдончаҳои варзиш, коргоҳу корхонаҳои истеҳсолӣ, муассисаҳои фарҳангӣ, тиббӣ, биноҳои маъмурию истиқоматӣ, ҳаммому сартарошхонаҳо, хатҳои обгузар ва ғайра талош доранд. Ин ободкориҳо, бешубҳа, моро ба ояндаи дурахшоне мебаранд.
Шаҳбоз АБРОР, «Ҷумҳурият»
Баёни ақида (0) Санаи нашр: 09.12.2019 №: 232 - 233 Мутолиа карданд: 673
