logo

суханрониҳо

Суханронии Президенти Ҷумҳурии Тоҷикистон муҳтарам Эмомалӣ Раҳмон дар донишгоҳи Синхуа, шаҳри Пекин, 1 сентябри соли 2017

Муҳтарам ректори донишгоҳи Синхуа!
Дӯстони азиз!
Барои ман шарафи бузург аст, ки унвони ифтихории профессори соҳаи иқтисодро дар яке аз маъруфтарин донишгоҳҳои Чин бипазирам. Аз Шӯрои илмии донишгоҳи шумо, ки ин ифтихорро барои ман муносиб донистааст, сидқан сипосгузорам. Аз ин рӯз эътиборан донишгоҳи шуморо ҷойи худӣ медонам ва ман ҳамаи рӯйдодҳои илмиву маърифатии онро бо камоли шавқ пайгирӣ хоҳам кард.
Донишгоҳи Синхуа ба ҳайси муассисаи олии таълимии барӯманд дар кишвар ва берун аз марзҳои он шуҳрат пайдо кардааст. Донишгоҳи шумо намунаи манзалати байналмилалии Чин, таҷассумгари орзуҳои насли муосиру ҷавон аст, ки бар уҳдааш бозидани нақши шарафманд дар бунёди ҷомеаи аз ҳар лиҳоз рушдёфта афтодааст.
Дар ин даргоҳи бошукӯҳи илму маърифат чандин наслҳо таълиму тарбия ёфтаанд, ки саҳми арзандаи худро дар тараққиёти Чини бузург гузоштаанд. Ин маҷмааи бонуфузи илму маориф, барҳақ, метавонад бо муҳассилини худ, ки дар қаторашон шахсиятҳои маъруфу соҳибэҳтироми Чини муосир ҷойгиранд, ифтихор намояд. Ҷанобони олӣ Ху Тсзинтао ва Си Ҷинпин, ки дар пешрафту шукуфоии кишвари барои мо дӯсту ҳамсояи наздик нақши намоён дошта, эътибори ҷаҳонӣ пайдо кардаанд, аз ҷумлаи онҳоянд.
Бо камоли хушнудӣ таъкид карданиам, ки ин ҷонибро бо ин сиёсатмадорони беҳамтои Чин солҳои тӯлонии робитаҳои корӣ ва муносиботи неки шахсӣ ба ҳам мепайвандад.
Дирӯз, мо бо Раиси муҳтарами Ҷумҳурии Мардумии Чин ҷаноби Си Ҷинпин атрофи ҳолати кунуниву дурнамои ҳамкориҳои кишварҳоямон музокироти сермазмун доштем ва уфуқҳои нави рушди онҳоро муайян намудем. Дар изҳороти муштарак, ки аз рӯи натиҷаҳои музокирот қабул гардид, мо рағбати қавии худро ҷиҳати пешбурди минбаъдаи муносибатҳои стратегии кишварҳоямон дар шакли шарикии ҳамаҷониба таъкид намудем. Аз ин нигоҳ, натиҷаҳои мулоқотҳои кунунии сатҳи олии ҷонибҳоро мо ҳамчун рӯйдоди марҳалавӣ дар муносибатҳои кишварҳоямон арзёбӣ менамоем.
Басо рамзист, ки вохӯрии навбатии сатҳи олии Тоҷикистону Чин дар соли ҷашнвораи 25 - солагии истиқрори робитаҳои дип-ломатии миёни ду давлат сурат мегирад.
Ҳангоме ки Тоҷикистон ба неъмати бебаҳои Истиқлолияти давлатӣ ноил шуд, Ҷумҳурии Мардумии Чин аз аввалинҳо шуда, ба роҳи мустақили интихобнамудаи рушди сиёсӣ, иҷтимоиву иқтисодӣ ва фарҳангии мо эҳтиром гузошт ва онро эътироф кард.
Тоҷикистони муосир қисмати фаъоли низоми равобити байналмилалӣ буда, дар ҳама гӯшаю канори сайёра дӯстони зиёдро пайдо кардааст ва дар байни онҳо Ҷумҳурии Мардумии Чин мақоми хоссаро доро аст. Дар кишвари мо Чинро дӯсти боэътимоду шарики самимӣ меҳисобанд ва мо аз пешрафту рушди устувори он изҳори хушнудӣ менамоем.
Ҷумҳурии Мардумии Чин дар арсаи байналмилалӣ мақому манзалати бузург дошта, дар равандҳои муосири сиёсат ва иқтисоди ҷаҳонӣ фаъолона ширкат меварзад ва дар таъмини суботу амнияти глобалӣ нақши созанда дорад.
Муносибатҳои дӯстӣ ва ҳусни ҳамҷавории мардумони мо анъанаҳои ғановатманди таърихӣ доранд ва аз даврони Роҳи абрешими бузург маншаъ мегиранд. Агар мо ба таърихи муосири ин муносибот назар афканем, мебинем, ки онҳо аз ибтидо ба масири рушди рӯзафзун ворид гардида, имрӯз дар сатҳи шарикии стратегӣ қарор доранд.
Ҳамдастии ду кишвар айни замон сохтори такмилёфтаеро мемонад, ки ба заминаи мустаҳками сиёсиву иқтисодӣ такя намуда, густариши босуръати ҳамкориҳои мутақобилан судманд-ро дар ҳама арсаҳои ҳаёт таъмин мекунад. Дар чунин шакл сурат гирифтани равобити байни ду кишвар ҷавобгӯи манфиатҳои дарозмуддати милливу муштараки мо буда, ба таҳкими суботу амният ва рушди минтақа мусоидат мекунад. Зиёда аз ин, он дурнамои тавсеаи минбаъдаи ҳамкориҳои фарохмиқёси моро дар бахшҳои сиёсӣ, тиҷоративу иқтисодӣ, амният ва чандин соҳаҳои дигари мавриди таваҷҷуҳи тарафайн муайян менамояд. Бо тақвият ёфтани муносибатҳои гуногунҷанба ва шарикии стратегии Тоҷикистону Чин аҳамияти робитаҳои фарҳангиву гуманитарии ду кишвар низ дучанд меафзояд.
Дӯстони гиромӣ!
Маълум аст, ки робитаҳои илмиву маърифатӣ ба инкишофи дӯстӣ, ҳамдигарфаҳмӣ ва рафоқати байни халқҳо мусоидати ҳамаҷониба менамоянд. Дониш ва илм дар садаи XXI мазмуну мундариҷаи хос пайдо намуда, ба неруи пешбарандаи ҳар як ҷомеа табдил ёфтаанд. Бе ин ду наметавон ояндаро сохт. Ин фикр, алалхусус дар замони мо, ки давраи ҷаҳонишавист, маънии амиқе касб мекунад.
Ба ин манзур, таҳкими низоми илму маориф ва дар ин замина омода кардани насли ояндасози кишвар яке аз самтҳои афзалиятноки сиёсати иҷтимоии давлати Тоҷикистон эълон гардидааст.
Дар доираи чунин сиёсат Ҳукумати Ҷумҳурии Тоҷикистон ҷиҳати баланд бардоштани сифати таълиму тарбия ва таҳсилот, донишу ҷаҳонбинии донишҷӯён, бархӯрдор гардидани онҳо аз дастовардҳои илму техникаи муосир саъю талошҳои доимӣ ба харҷ медиҳад. Вобаста ба ин, мо ҳамеша кӯшиш менамоем, ки тамоми шароиту имконотро муҳайё созем, то ҷавонони мо тавонанд дар дохилу хориҷи кишвар таҳсилу касбомӯзӣ намуда, номбардори Ватанашон шаванд. Дар ин росто, мо ба тавсеаи робитаҳоямон бо Чин дар соҳаи маориф  таваҷҷуҳи пайвас-та зоҳир менамоем ва ҳамкориҳоямонро дар ин арса яке аз самтҳои муҳими  маҷмӯи муносибатҳои ду кишвар медонем. Дар ин ҷо барои муқоиса мехоҳам як мисол биёрам.
Соли 1994 аввалин ду донишҷӯйи Тоҷикистон барои омӯхтани забон вориди Чин гашт. Ҳоло бошад, дар як саду дувоздаҳ донишгоҳи кишвар қариб се ҳазор ҷавонони мо бо таҳсил фаро гирифта шудаанд. Дар баробари ин “Маркази фарҳангиву таълимии Конфутсий” дар Тоҷикистон фаъолияти худро самарабахш ба роҳ мондааст.
Ҷониби Чин ҳамасола барои таҳсили ҷавонони Тоҷикистон дар донишгоҳҳои худ бурсияҳои таълимӣ ҷудо карда, давраҳову семинарҳои кӯтоҳмуҳлати таълимӣ ва баланд бардоштани малакаи касбии мутахассисони соҳаҳои гуногунро ташкил мекунад. Мо чунин иқдомҳои хайрхоҳонаи дӯстони чиниамонро баланд арзёбӣ менамоем ва хоҳони идомаву тавсеаи робитаҳоямон дар соҳаи маориф ҳастем.
Ман хурсандам, ки сол аз сол теъдоди ҳар чи зиёдтари донишҷӯёни тоҷик ба ин ҷо, ба Чин барои омӯхтани забони Конфутсий ва забони Дэн Сяопин омада, дар беҳтарин донишкадаву донишгоҳҳои Чин таҳсил доранд, илму маърифат ва касбҳои муосирро аз худ менамоянд. Мутмаинам, ки дипломи донишгоҳҳои Чин ба ҷавонони мо дарвозаеро барои оянда боз хоҳад кард.
Дар робита ба ин, мехоҳам бо чанд нуктаи мушаххас ба ҳамватанони худ – донишҷӯёни таълимгоҳҳои кишвари ба мо дӯсту хайрхоҳи Чин, ки дар ин толор ҳузур доранд, муроҷиат намоям. Нахуст мехостам ҳамаи шумоёнро, ҳамватанони азиз, бо Рӯзи дониш, ки ҳамасола якуми сентябр дар тамоми гӯшаву канори Тоҷикистон ҷашн гирифта мешавад, табрику муборакбод намоям. Умеду ормонҳои мо аз шумо - насли наврасу соҳибмаърифат бузурганд.
Бо истифода аз беҳтарин имкониятҳои бароятон фароҳам овардашуда тамоми нозукиҳои касбу ихтисосҳои интихобкардаатонро аз худ намоед. Ба ин муносибат мехоҳам як зарбулмасали чиниро ба ёд орам, ки мегӯяд: “Аз хоб дер хестӣ, рӯзатро бохтӣ, дар ҷавонӣ илму дониш аз бар накардӣ, ҳаётатро бохтӣ”.
Дар такя ба андӯхтаҳои маънавию ахлоқии ниёгони бузургамон, ки дар таърихи илму фарҳанг ва тамуддуни ҷаҳонӣ чун офарандагони сарватҳои бузурги маънавиву моддӣ эътироф шудаанд, доираи ҷаҳонбинии худро васеъ гардонед, забон ва фарҳангу маданияти волои мардуми Чинро барои истифода дар ҳаёт ва фаъолияти минбаъдаатон амиқ омӯзед.
Мо умедворем, ки шумо ба Ватан бо донишу малакаи баланди касбӣ баргашта, ба манфиати ҷомеа хизмати самараноку арзанда хоҳед кард.
Ҳеҷ гоҳ фаромӯш накунед, ки ояндаи Тоҷикистон дар дасти шумо, ҷавонон - мутахассисони соҳибилму дорои малакаи баланди касбӣ, аст.
Дар хотимаи сухани худ бори дигар ба ҳайати донишгоҳи Синхуа барои истиқболи гарм ва ҳусни меҳмоннавозӣ ибрози сипос менамоям.
Ба ҳамаи шумо, ҳозирини гиромӣ, сиҳатмандии комил, хотири ҷамъ ва тамоми хушиҳои зиндагиро орзумандам! 
Ҳамеша сарбаланду пирӯз бошед!


Баёни ақида (0)    Санаи нашр: 4.09.2017    №: 187    Мутолиа карданд: 1553

26.05.2018


Қоҳир Расулзода бо Алекен Еминбахэ мулоқот намуд

Ҷаласаи Шӯрои вазирони мудофиаи давлатҳои аъзои СААД

Вохӯрии котибони шӯроҳои амният

24.05.2018


Симои сиёсӣ ва фарҳангии Пешвои миллат

Мулоқоти Шукурҷон Зуҳуров бо Алекен Еминбахэ

Вохӯрии ҳайати вазоратҳои корҳои дохилии Тоҷикистону Ӯзбекистон

Рӯнамоии иқтидори сайёҳии кишвар дар Боку

ҶАЙҲУН. ПИЁЗ ЗИЁДУ ХАРИДОР КАМ

Ҷаҳон дар як сатр

СҲШ: таваҷҷуҳи вижа ба таъмини амнияти лоиҳаҳои байналмилалии стратегӣ

Ширкати 15 ҳазор меҳмон дар ҳамоиши иқтисодии Петербург

Макрон бо умеде ба Санкт-Петербург меояд, ки «Русияро ба Аврупо орад»

Дар Ҳилманд 15 нафарро аз асорати «Толибон» озод карданд

Қазоқистон гандуми бисёрсола парвариш кардан мехоҳад

23.05.2018


Ҷаласаи Шӯрои сарони ҳукуматҳои ИДМ баргузор мегардад

Вохӯрии Абдураҳим Қаҳҳоров бо Чжао Кэчжи

Тоҷикистон дар ҳифзи нигаҳдории гуногунии биологӣ саҳми назаррас дорад

Ҷаҳон дар як сатр

Рашид Олимов: «Масоили амниятӣ таваҷҷуҳи бештар мехоҳад»

Дар Олмон ба хотимабахшии «давраи яхбандӣ» дар муносибат бо Русия даъват намуданд

Аморат низоми раводидро барои сармоягузорону мутахассисони баландпоя сабук кард

Қазоқистон: имтиёзҳои қарзи манзил барои омӯзгорон ва табибон

Қирғизистон барои иштирок дар лоиҳаи «Digital CASA» беш аз 3 миллиард рубл мегирад

21.05.2018


Ҷаҳон дар як сатр

Пекин ҷонибдори бунёди тамаддуни экологист

Маҳви 65 ҳазор ҷангӣ дар Сурия

Вашингтон барои мубориза алайҳи терроризм қариб $3 триллион харҷ кардааст

Иттиҳоди Аврупо ба ИМА роҳи пешгирии боҷро нишон дод

Мансабдорони Қазоқистон аз ҳаққи узвият дар созмонҳои динӣ маҳрум мешаванд

18.05.2018


Ҷаласа таҳти роҳбарии муовини Сарвазири мамлакат

Брифинги матбуотӣ оид ба натиҷаҳои Конфронси байналмилалии Душанбе

Ифтитоҳи Маркази таҳсилот, илм ва фарҳанги Беларус

17.05.2018


Баррасии масоили соҳибкорӣ

Вохӯрии Исматулло Насредин бо Эндрю Гилмор


Дар сомонаҳои дигари Тоҷикистон хонед